阮兆祥夜冷店尋寶尋出昔日2大珍貴回憶！87歲店主Annie靈魂極有趣

阮兆祥走遍大街小巷探索老字號

原來「夜冷店」對祥師兄有特別意義，皆因他當年第一次搬到外面住時，也是在「夜冷店」中物色家居用品或傢俬，並對「燈」情有獨鍾，祥師兄：「最多一次係一口氣買咗三盞燈、一張櫈，名副其實燈燈燈櫈。」

阮兆祥夜冷店尋寶尋出昔日2大珍貴回憶

這次因節目之名重踏「夜冷之路」的祥仔，再度成功挖到不少寶藏，除試戴了份量十足的「林亞珍眼鏡」、見識第一代「估你唔到」熨斗、不同年代的明星相、懷緬第一代他媽哥池，還找到了三項別具意義的寶物，分別是無綫20周年台慶特刊、無綫出版的雜誌及自己25歲時推出的第二張個人黑膠碟《我心深處》。

最巧合的是，雜誌其中一篇文章，正正是祥師兄當年憑《溏心風暴》「舅父波」一角勇奪最佳男配角的報道，令祥師兄昔日珍貴得獎回憶返晒嚟。

試戴「林亞珍眼鏡」樣子極趣怪

難得尋獲自己當年推出的黑膠唱片，祥師兄自然九秒九決定購入，可惜卻遭佻皮的Annie連番出招阻撓，一時要求祥仔即席獻唱：「快啲唱一隻歌仔畀我聽吓得唔得呀？」一時又玩派檸檬：「你想買呀？好難喇！」

87歲夜冷店店主Annie靈魂極有趣

幾經周旋，Annie最終開出一個開賣條件令祥師兄甘拜下風；再加上Annie一時要求扮拍拖、一時要求打手板、一時送飛吻、一時玩「你問我答」花臣多多，令祥仔終忍不住封她為「冧仔高手」。

阮兆祥獲激讚體貼兼被追問「結婚未」

經過Annie一輪強攻，祥師兄最終豁出去與對方合唱已故歌后鄧麗君經典金曲，氣氛歡愉。玩完一大輪，Annie不忘大讚祥師兄為人體貼：「祥仔好隨和，佢唔會抗拒我幾十歲，好體貼，對我扶出扶入，我想問吓佢結咗婚未呢？」

除了佻皮，Annie亦有感性一面，當她向製作組分享經營夜冷店的各樣點滴時，除笑言與客人「講心唔講金」，合眼緣的一毫子也願意賣走心頭好，又揚言不退休全因捨不得小店中與自己建立了多年感情的「舊物」：「做到我冇能力做咯，我儲咗幾十年嘅嘢，拎咗去堆填區係好可惜嘅。」