熱愛優質生活
首頁   \   港熱話   \   巴士司機與離地空姐的一場上層戀愛

巴士司機與離地空姐的一場上層戀愛

巴士司機與離地空姐的一場上層戀愛
2015.11.06

  文: 藍橘子

【巴士司機就係注定畀人睇唔起】

巴士司機與離地空姐的一場上層戀愛
 
我叫阿康,今年廿八歲,好多人眼中係一條廢青。讀書唔成中五畢業就出黎做跟車,後來轉做中港貨車司機,後來屋企人有病入院,我辭咗份工照顧佢,有次陪屋企人覆診時,咁啱見到巴士公司請人我就即刻去應徵,對於揸慣大車嘅我,只求安全不求快嘅巴士簡直毫無難度,最後我都順利成章咁轉行做巴士司機。
 
不過,仲係好多人都對司機呢個職業有偏見,好似喺親戚口中,我只係由一份「唔正經嘅工」轉做「至少有份正職」。
 
仲有好多白領都睇我唔起,覺得我揸巴士無前途。但老實講,你哋又何嘗唔係每朝逼巴士返工?我每朝就坐喺司機位望住你哋逼車追車,我絕對唔會叫乘客行入少少畀多啲人上車,你差幾步追到巴士站咩我夠鐘就照樣開車,不知幾爽!
 
幾個月後我轉咗揸機場線後,路程又長又悶。不過…就畀我遇到佢!佢叫Macy,係一個空姐。
 
相信空姐係每個男人嘅夢想,我亦都係一樣。有一朝早,我鼓起勇氣同佢打招呼…
 
「嗨 Macy,今朝又要飛早機啊?」
 
「咦?你點會知我英文名?」
 
「因為妳名牌寫住囉,日日開工都見到妳,咪認得妳囉。」
 
「哈哈,係咩?我都無留意添。」我唔怪佢,喺乘客眼中,我只係咁多個巴士司機其中一個,但喺我眼中…Macy著空姐衫真係好正囉!
 
「咁妳記住第日留意吓喇,我每日都返呢個更。」
 
「哈哈,好啊,我留意返你名牌。」
 
「我叫阿康啊!」我指一指自己擺喺車頭嘅名牌:「咁吖,如果妳有日遲咗起身就SEND個WHATSAPP畀我,我睇到短訊就揸慢啲等埋妳囉。妳知啦,呢個鐘數要等多廿分鐘先有下一班巴士嫁。」
 
「咁都得嫁咩?好啊!」
 
其實我早有準備,呢段對話喺個腦入面複習咗好多次,我將寫咗我電話號碼嘅紙條遞畀Macy。
 
起初半個月,我哋都只係維持喺見面打招呼嘅關係,直至有一日,我由總站開車之前收到佢短訊,話今日要趕飛機,本身要搭上一班車,但遲咗起身趕唔切,問我可唔可以揸快少少…
 
其實搭慣機場線,都會預定巴士到站時間,如果我十分鐘開去Macy個站,就會有好多人因此而趕唔到我呢班車而遲到…
 
但係!其他人遲到關我叉事咩?喺我眼中,佢哋只係萬千乘客其中之一,Macy先係我唯一囉!於是,我早十分鐘由總站開出,結果去到Macy上車個站,佢見到我架車埋站時向我微一微笑揮手~
 
 
嗰一次之後,我同Macy就開始熟絡咗。我用裝喺車頭電視個Cam留意到,佢每次上車一放低行李,就會去上層最前排位置坐低,我問佢點解咁鍾意坐嗰個位,佢答我:
 
「坐最前咪無人見到我素顏同埋化緊妝時個樣囉~」
 
「咁我咪好幸運,每日妳上車就見到你素顏,落車就見到你化完妝個樣。」
 
「唔~都係嫁~」
 
日子耐咗,我同Macy周不時會喺Whatsapp傾計,講佢自己返工企到隻腳好痛,又遇到無禮貌嘅強國客,不過佢最憎就係對佢毛手毛腳嘅變態佬。我覺得係時候要再進一步,所以我第朝總站開車前買咗份早餐,然後放喺Macy坐開個位度,寫住For Macy。我會唔會做多咗?佢會唔會將我當係賴蝦毛想食天鵝肉嘅變態佬?
 
「多謝你份早餐啊~」Macy落車時拎住我買畀佢嘅早餐同我講多謝。
 
由佢嘅笑容可以知道,我得咗喇!從嗰日開始,每次知佢返工都會買唔一樣嘅早餐畀佢食,佢仲會喺巴士自拍張相,寫「Thanks you for your breakfast」貼上面書。
 
本來我以為搵到份固定工作,有個空姐女朋友,人生會一帆風順,點知有一日,Macy突然Send個短訊畀我…
 
「阿康,聽日開始唔洗買早餐啦…」
 
「唔舒服啊?不如買碗粥畀妳吖。」
 
Macy已讀不回,我怕佢真係病咗怕阻住佢休息,所以無再搵佢。
 
我同自己講唔緊要!有危即係有機,於是我當晚通宵煲咗瑤柱白碗,用保溫瓶裝住帶返工,今次我無擺喺前排座位,因為我想親手畀佢。
 
點知,我去到平時Macy上車個站,見到佢企喺巴士站前少少路口,唔通佢驚遲到所以想截的士?

當我埋站停喺度望多陣,就見到一部紅色車停喺Macy面前…

不過呢部唔係的士,而係Lamborghini開蓬跑車…
 
我見Macy手拎住盒早餐上車,就立即開車跟住佢地尾。巴士司機位視點夠高,架車又開住個蓬,所以我好清楚望見車上面情況,Macy同個司機有講有笑,仲打開個早餐盒親手餵個司機食。而個司機就好忙碌咁一手揸住馱盤,一手摸緊Macy隻腳。
 
香港馬路勝在夠多燈位,我過兩個街口就同架Lamborghini平排,我見司機著住制服,一睇原來係一個鬼佬機師!即係點啊?其他人就係變態佬,飛機師就可以摸大脾兼餵早餐啊?
 
去到機場總站,我拎住仲熱騰騰嘅粥行入機場大堂,我都唔知點解自己要咁做,行左一圈都搵唔到Macy蹤影,我心灰意冷將成兜粥扔落垃圾桶,隔一陣有個清潔阿姐行埋黎,見到兜粥就發牢騷話…
 
「哎呀!邊鬼個咁浪費,日日都丟份未食過嘅早餐落垃圾桶,今日連個保溫瓶都丟埋,唔食就唔好買啦真折墮…」
 
呢一刻我終於知道,原來Macy一直都睇唔起我。

我只係望見上咗巴士嘅佢無望真外面個世界,而佢就一直望住外面,我永遠只係一個巴士司機。

我以為有家屬乘車優惠好巴閉,將來我老婆仔女都可以免費搭巴士。

但係Macy,從一開始就想搵一個令佢唔需要再坐巴士嘅男人。

 

本篇圖文獲作者藍橘子授權刊登,未經准許,請勿轉載!
藍橘子 facebook: https://www.facebook.com/BlueGodZi/

 

內容評分
評語