健康餐盒詐騙過程全曝光！港人誤信FB廣告被騙四位數：根本無處不在！網民教8招分辨騙局

文: 黃樂恩

2026.04.16

網購騙案防不勝防，就連標榜健康的餐盒亦再次成為騙徒工具！日前再有港人墮入騙局，指在Facebook看到健康餐盒廣告後經WhatsApp下單，最終損失逾$2,000。事件引發網民熱議，有人指騙局早已存在多年，甚至懷疑利用平台演算法設局，引導用戶逐步降低戒心。亦有網民分享多項防騙貼士，提醒市民避免再中招。

健康餐盒詐騙重現騙案手法全曝光

一名港人在Threads以「詐騙死全家」為題發帖，表示本周二（14日）早上在Facebook看到一則健康餐盒廣告，因內容及版面設計看似專業可靠，於是透過WhatsApp向店家查詢詳情，並決定與朋友一同下單，當日下午13:22便透過轉數快（FPS）支付了$2,230。

健康餐盒騙案全過程曝光

點擊圖片放大

轉帳四位數後知中招 FB專頁竟消失無影

對方確認收款後，隨即要求樓主轉往另一個WhatsApp號碼進行「跟進」。怎料當晚深夜23:55，對方突然以「人手不足」為由表示未能送貨，需要取消訂單，並承諾於翌日下午退款。樓主其後察覺有異，隨即重新搜尋相關Facebook專頁，卻發現頁面已消失無蹤，才驚覺墮入騙局，並即時透過電子報案系統報警。

事後，樓主懊惱表示：「一直以為自己好醒唔會中，但根本無所不在，未中唔代表唔會中」，並公開相關對話截圖，提醒他人提高警惕。同時，他亦呼籲大家遇上類似情況，建議應盡快報案及備案，越早報案，越有機會追查資金。

騙案早已存在多年？網民：年年都有人中計

事件引起網民熱議，不少人直言相關騙局早已存在多年，「健康餐盒呢招最少出現3年」、「年年都會有人唔知中計」。有網民批評受害人警覺性不足，指「抵比人呃，自己乜都唔Search乜都唔懷疑」、「價錢根本唔make sense」。更有留言貼出螢幕截圖，指涉事騙徒使用的WhatsApp帳號仍然存在，呼籲其他人小心提防。

即睇網民留言

健康餐盒呢招最少有3年，你係醒嘅根本睇都廢事...
抵呢啲人比人呃，自己乜都唔Search乜都唔懷疑
諗都諗到，一個咁平嘅價錢，可以做到全香港都送到，究竟佢廚房喺邊？
$2230原來咁輕易就信網上幾粒字就發過去
千萬唔好相信，呢個騙徒偷咗餐廳嘅相，開左好多詐騙戶口
呢啲騙子一個都嫌多！搞彎哂成個行業呢種呃錢呃左好多年
年年都會有人唔知中計，因為佢成本好低，垃圾fb防唔到
健康餐騙案好耐啦，其實個運作模式、價錢根本唔make sense
報警警察都會話追唔返，但都千祈唔好偷懶一定要報警，起碼舉報咗佢個電話號碼先
唔需要諗報案可以搵得返啲錢，警方最多同你落口供，你嗰二千幾蚊當教訓啦

網民拆解騙徒手法疑利用Facebook演算法設局？

有網民進一步分析騙徒手法，指其並非單純以「超低價」吸引受害人，而是疑似利用Facebook演算法進行「分層設局」。騙徒可能同時經營兩個專頁，其中一個以極低價格作招徠，吸引對價格敏感的用戶直接下單；至於對價格存疑、未即時落單的用戶，系統其後或會推送另一個「價格較為合理」的專頁，以降低用戶戒心，從而作出購買決定。