中年好聲音4｜羅天宇24強止步出局賽果惹不滿 高分淘汰被質疑有內情？

破格演出大騷Rap功 陳懿德撐場狂歡呼

一直走抒情路線的「獅子王」羅天宇今集誓要為大眾帶來極大反差。他刻意戴上黑超配襯型格皮褸，化身「未來戰士」單膝跪地強勢登場，獻唱《Why You Gonna Lie》時大騷隱藏多年的Rap功。

他在歌曲尾段更大跳勁舞，傾力演出瞬間引來全場觀眾瘋狂喝采。專程到場支持天宇的緋聞女友陳懿德與「東張女神」鄧凱文看得極度投入，陳懿德全程不斷高聲歡呼兼興奮拍掌，以行動力撐男方。

羅天宇有一個男團夢 張佳添直指揀歌冒險 

羅天宇賽後自爆一直有個男團夢：「咁多年後，有機會嚟到呢個舞台，咁我梗係要追吓夢啦。」希望以不一樣的羅天宇帶給觀眾驚喜。評審張佳添直指他絕對適合走偶像路線，但要提升實力：「雖然我覺得你揀呢首歌幾冒險，但又真係畀到耳目一新嘅感覺我哋。你踎喺度唱係好型，但會犧牲咗少少用氣，嗰一段啲氣會少少弱咗啲。」

另一評審海兒亦認為他Rap的部分佔去太多比例，令剩餘的演唱部分壓力大增，「所以你唱嗰部分一定要唱得好好多。」

團隊落敗慘被淘汰 羅天宇緣盡24強已無憾

經過殘酷激戰後，「吳亦偉隊」最終以總分5：3擊敗「尤淑情隊」。「尤淑情隊」必須面臨淘汰兩人的殘酷懲罰，評審們「退庭商議」後，最終決定將羅天宇與楊嘉瓏雙雙淘汰出局。

面對24強止步的現實，羅天宇坦言：「我覺得係一個好正嘅旅程，好多謝《中年好聲音》呢個舞台，因為佢哋首先畀咗一個機會我哋藝人去追夢，同埋畀咗一個『獅子』我覺得好正，因為本身我成日都好怕呢樣怕嗰樣，好大壓力，幾晚瞓唔到，點樣可以唱好啲？點樣可以同呢班『野獸』去鬥呢？今日我覺得我做到喇，好開心可以同大家有呢一段嘅經歷。」

賽果隨即引起網民強烈不滿，質疑高分出局另有內情。有人就猜測羅天宇身為TVB藝人，可能因為工作行程與比賽衝突，無暇分身才被迫「止步」。