九龍殯儀館超高薪請前台接待員！朝九晚六 月薪高達30K！網友：窮慘過見鬼

九龍殯儀館請人 頂薪30K請前台接待員

近日社交平台上瘋傳一則招聘廣告，內容提及九龍殯儀館正聘請前台接待員，月薪介乎$18,000至$30,000，視乎工作經驗而定。根據招聘內容，前台接待員主要負責接聽電話預約、處理現場及電話客戶查詢、電腦資料輸入、現金收款及點算，以及到銀行處理公司支票及現金、公司日常繳費、記錄出入數。

點擊圖片放大

至於入職要求方面，該職位學歷門檻不高，應徵者需具備中三程度、操良好粵語，略懂普通話及英語，並懂得中文輸入法及基本電腦文書處理，包括Microsoft Word及Excel等。該職位屬全職工作，每周工作6天，工作時間為上午9時至下午6時或上午10時至下午7時，需輪班工作。另外，於黑色暴雨警告及八號烈風或暴風信號生效期間，員工亦須如常上班。

網友讚筍工：窮慘過見鬼

不少網民認為薪酬吸引，更直言「其實生人仲恐怖過鬼」、「怕窮鬼，其他鬼老子都不怕」、「我失業嘅話都會去做，反正冇咩驚得過做死窮鬼」。亦有人笑稱「撞得鬼多，就可以做埋師傅」、「啱我，我住正對面，5分鐘即到，黑雨番工冇難度」，更有網民形容「大把人會應徵，窮慘過見鬼」。

即睇網民留言

+3

+2

點擊圖片放大

人工差距咁大？網友感疑惑...

亦有網民對招聘細節感到疑惑，「Apply要send近照做乜？整車頭相？」、「18000-30000咁闊嘅，點達到3萬？」、「人工點解可以由18000-30000？要跑數？」亦有人關心工作內容，「洗唔洗入殮房同接觸屍體？」以及「有員工福利嗎？」等問題。

8號波都要返工？網民力數3大缺點...

不過亦有打工仔認為這份工作吸引力有限，「返足6日wor，馬馬地」、「唔係返6日嘅話衝了」，甚至笑言「包唔包撞鬼」。更有網民就上班安排提出質疑，「8號都要返？無車喎，的士呀？你估個個都搭得起咩，到時起價300幾，有冇得claim先？」

來源：moovup、Threads