傅穎久違5年強勢復出！驚喜推新歌《成年禮》 自嘲「又可以笑下啦」

傅穎久違5年強勢復出！驚喜推新歌《成年禮》 自嘲「又可以笑下啦」

傅穎日前在社交平台（IG）上幽默發文宣傳，寫道：「傅穎竟然出新歌！各位又可以笑下啦！！」更豁達表示，如果自己的音樂可以給大家提供一點快樂，她非常樂意。新歌已於5月20日在電台首播，MV亦已於當晚在YouTube首播，並於5月21日凌晨正式上架各大音樂平台，旋即引發集體回憶與網民熱烈討論。

這首久違的廣東歌新作《成年禮》對傅穎而言意義重大，她不僅親自參與了填詞部分，更現身參與了音樂影片（MV）的拍攝工作。歌曲由黃志遠一手包辦曲、詞、編及聯合監製，並邀得著名音樂人Terry Chan共同監製，製作陣容相當用心。

《成年禮》 歌詞的內容非常直白，全部是Theresa的心聲。歌詞講述人生上半場，由小時候到年輕時曾經遇到的挫折及紛爭，曾經好介意的謠言和別人的評價，甚至對世間黑白顛倒的絕望，以及渴望有人能看出真偽的心情，去到人生踏入下半場，一切都變得唔重要。

Theresa坦言：「以前發生所有唔好嘅嘢，一轉念全部都變成好事。如果冇以前呢啲經歷，唔會有而家嘅自己。所以《成年禮》就係過往咁多年喺我身上所有負面嘅嘢，變成咗一份禮物。」

Theresa透露，這次MV由策劃、拍攝到剪輯，全程只有她跟團隊的兩名女生。Theresa笑言：「佢哋兩個都係首次操刀拍MV㗎！好厲害！」成本方面，Theresa直言超低成本：「我哋只係買咗幾個蘋果同一支泡泡槍，哈哈。自己化妝整頭，條裙係好幾年之前買落、一直搵唔到機會着，條格仔圍巾係20年前戴嗰條！」

拍攝期間更發生了一段小插曲，Theresa指想加一個男主角於MV中，於是便在公園內周圍望，專找全身穿純白或純黑色衣服的男生，「最後真係見到一個着全身純黑色嘅男仔，我哋三個就咁貿貿然行過去邀請佢客串一個鏡頭，冇酬勞㗎，哈哈！」結果這位「臨時演員」順利完成任務，成為MV入面唯一冇樣睇的神秘男角。

而MV中出現的青蘋果及紅蘋果，Theresa就分享到背後的構思，「一個青蘋果，係好難去變成一個紅蘋果的。好多人年輕嘅時候都可能希望自己同其他人一樣，顯得自己唔會太格格不入。但其實每個人天生都唔一樣，你唔需要令到自己同其他人一樣，你就係獨一無二嘅你。」

她回憶起其中小時候已自覺跟別人不一樣，小學及中學都是出名「貼住牆行路」的安靜學生，「我一路懷疑自己，我有乜嘢問題呢？」但隨着成長，尤其30至40歲這十年於內地工作，大部份時間獨處及看書，她發現心境越來越平靜，亦慢慢改變了對過去的想法，「以前出書寫好多自己嘅感覺同故事，其實係為咗醫番好自己內心。而家過咗40歲，我諗嘅係自己可以創造到咩價值畀其他人。」

Theresa表示其實大家都是「睇住佢大」，成長過程中很多經歷，外人未必知道箇中因由，只係見到當中某一面，但Theresa最後說：「以往發生所有唔好嘅嘢，一轉念全部都變成好事。如果冇以前呢啲經歷，我諗我唔會成為而家嘅自己，所以呢個《成年禮》就係過往咁多年喺我身上所有負面嘅嘢，變成咗一份禮物。」

Theresa 傅寶誼 《成年禮》MV