龔嘉欣孔德賢親揭關係非中小學師姐師弟咁簡單 「由細到大望住佢張相練舞」

龔嘉欣孔德賢組姊弟CP成功入屋

自劇集開播以來，龔嘉欣（Katy）與孔德賢（Danny）互寸又互撐的姊弟情一直甚為入屋，昨晚痛錫細佬的畢萍，當得悉畢鳴因落雨風濕發作，即主動幫畢鳴按腳，之後更順應畢鳴要求，像小時候般幫其𢱑背脊，二人「零邊界感」的親密互動，加上Katy邊按腳邊吟吟沉沉的貼地家姐Feel、Danny「細佬感滿滿」的向家姐冧求𢱑背脊，均令場口溫馨滿瀉。

+2

點擊圖片放大

原來兩人關係匪淺︰由細到大望住佢張相練舞

劇中二人姊弟情深、劇外二人惺惺相惜，而且仲有極深淵緣。Danny接受訪問時透露，原來他與嘉欣不但小學中學都同校，二人原來都加入過舞蹈隊，Danny小時候更望住嘉欣張相跳舞，如今二人為了宣傳，又經常一起跳舞，確是十分有緣份。

+2

點擊圖片放大

Danny：「嘉欣係我師姐，我記得中學個禮堂老師貼咗佢張相喺度，我由細到大喺舞蹈隊就係望住佢張相跳舞，佢又咁啱係舞蹈隊，所以我覺得我哋好有緣份，我同佢講嘅時候佢都覺得好神奇。」Danny續指直到現在，這位師姐都很照顧他，自己戲內戲外都是稱對方做家姐：「無論做戲或者日常嘢，我都會問嘉欣意見，佢亦都好樂意將自己所知道嘅嘢話我知，拍完套劇多咗個家姐真係好開心。」。

+2

點擊圖片放大

至於Katy，則對「細佬」有讚無彈：「我覺得Danny好用心做呢一部戲，我同佢都好有火花，大家嘅鬥嘴戲好正。我自己都好鍾意畢氏姊弟嘅場口，令到成套劇多咗份溫馨感。」。