古天樂紅館演唱會門票內部預售5分鐘賣晒！豪氣回應「淨係著底褲」拍廣告

練氣備戰紅館預售5分鐘斷纜！古仔笑看宣萱為看騷改機票傳聞

談到紅館個人演唱會，早前內部預售一開波，在短短5分鐘內全部被搶購一空，速度堪稱恐怖。古仔在現場也忍不住露出驚訝笑容，直言：「真係冇諗過咁癲，但見到大家咁支持，我都好開心，所以依家一定要認真練氣備戰！」

他大方透露這次演唱會將會「以唱歌為主」，勢要用歌聲回饋樂迷。不過當現場記者追問會不會再度加場、以及老友宣萱是不是真的為了看他的騷而特意修改機票行程時？古仔隨即調皮地不斷耍手擰頭，神秘地笑稱今日唔講得，全部留返下星期一的演唱會官方記者會揭盅。

十字韌帶舊患拒喪跑改急步 自爆「只著底褲」拍廣告：咩唔得！

為了在舞台上又跳又唱，古仔自爆最近每天都維持高強度運動來鍛鍊肺容量。不過，由於以前曾受過十字韌帶斷裂的重傷，他直言現在不敢盲目喪跑，只能靠「急步行」來達到練氣效果。

一向是波鞋收藏家的古仔，更透露未來有興趣跨界設計帶有重金屬、卻保持輕量化的「科幻風波鞋」。由於他長年保持精壯身形，被問到：「如果未來有男士內衣品牌找你合作，要求你『淨係著底褲』拍廣告，你得唔得？」沒想到古仔完全沒有偶像包袱，竟然非常豪氣地回答：「咩唔得？我覺得我都可以㗎！哈哈！」 

偕老友佘詩曼飯局慶生 澄清：我唔賭錢

此外，前陣子古天樂被拍到與老友兼視后佘詩曼（阿佘）一同吃飯慶祝生日，被問到當天有沒有趁機在麻雀枱上互相切磋時，古仔聽後即表示：「純粹係食飯慶祝，我平時唔賭錢㗎！麻雀定係啤牌，我都唔係好玩。」