【絕望真相】《一生人只為搵一個，與你相隔半小時車程的女友》
文：電視汁撈飯
喺香港，搵個女朋友住邊真係好緊要，因為如果你同佢住得遠，有可能仲辛苦過Long D。每次出街前女友總會send一句「你會黎接我架可」外加「笑到瞇瞇眼、臉頰紅紅」Emoji，或者出街後在你身前環抱著你，瞪大雙眼然後扮可憐「你係咪會送埋我返去架~」果一秒諗點回，仲難過諗分手message...
如果你話「唓~送返屋企之麻，其實唔難」，只有兩個可能：
一你無女....咁無野好討論啦
二你有車...咁更加無野好討論
但如果你同大部份可憐蟲一樣，咁岩有個好好既女朋友，又咁岩只係喺社會打滾左幾年，唔捨得買車，的士都好少搭，你就會明白果份現代都市人喺繁華鬧市背後既悽苦，每次喺送同唔送之間幾咁鬥爭...
首先若然好好彩，你地兩個都住港島，就算唔係好有錢，可能係灣仔唐樓外加鰂魚涌屋邨，都已經夠哂幸福。雖然仍然要面對住Times Square、太古城、Sogo呢啲根本並非為香港大眾而建的邪惡資本主義標記，但至少去完銅鑼灣、天后、北角，送佢返完屋企再自己獨自歸家，都唔使一個鐘，基本上你地可能連旺角都好少去，去新界同去台灣既次數差唔多..
但因為香港地少人多(?)，開拓左大量新市鎮，在加上樓價高企，兩個人好容易就住到好似牛郎織女咁遠，考驗就黎啦。
最恐怖的對決係咩？
上水同將軍澳？屯門對石硤尾？荃灣勇戰香港仔？藍田對青衣果程地鐵搭得多應該會抑鬱。九龍城與東涌的感情應該好快淡去...
你體會過就會明白，原來除左人力錯配，資源錯配，食物供應錯配，薪酬錯配之外，連感情、地域都可以錯配。
你亦同時驚醒，為何那麼多人說，要在讀書時拍一次拖，好好珍惜那段兩小無猜的青澀，因為學生一齊得既，通常住得再遠都有極限，怎也出現不了天水圍與柴灣的悲劇吧(好似係)。
而除了車程遠，如果還要轉車，那漫長的一小時，不能完全昏迷、只能斷斷續續短睡幾分鐘又要醒，怕搭過龍、走了尾班車，那份缺乏安全感的空虛，絕對比相隔異地害怕對方出軌更痛苦。
由初相識的偶爾給她驚喜出現在她的樓下，到熱戀初期還能甜蜜地管接管送，
吵架時還會不顧一切由觀塘乘的士到元朗，到後來穩定下來只能在旺角的巴士站目送她離開，原來長久的感情也難敵冗長的車程，再濃的蜜意也會被車費溶掉，那天的山盟誓約，也會被第朝返9點的疲倦抹走。
去完街10點，第朝仲要返工，在已經空蕩的車廂中，難得可以坐下來(依家搭地鐵有得坐要用難得...)，眼望眾人帶住疲憊既面容趕回家，你會想，其實真正《愛．回家》的劇情應該是發生在地鐵的。
學生們補習補到hihi仲要返去做功課，白領剛剛OT完明天還要OT，你安慰著自己其實遇上了她，還能準時放工，一起晚飯已經萬幸，但從車門上的玻璃窗看到車廂外的漆黑，那份空洞卻又好像預視了我倆的將來...
「點解你依家咁少送我返屋企既...」她扁著嘴。
「聽朝要返工麻...」
「初初識你、一齊你都係咁送架！」開始扮嬲鳥。
「..」
住得愈遠，感情就愈易磨蝕；
車程和感情應該是inversely related；
送，第朝無精神；
唔送，果晚已經無精神....
其實除了捱麥記，心底裏我們還潛藏著一個畢生心願 —找一個與你相隔只有半小時車程的女朋友，呀媽教落「貧賤夫妻百事哀」，感情，未必鬥得過車程。
但退一步，如果連呢個考驗都跨得過，仲有咩難到我？
有時是咪應該更慶幸，曾經窮過捱過患難過，真情才讓我們知道沒有揀錯。
就算再遠，逆行還是希望找到一個，願意真心為她付出那一小時十五分鐘(要轉車)，又或是她能體諒我而講一句「我自己搭車啦！」的人。
少女們，請好好珍惜果個無車仲肯成日送你返屋企的小伙子。
逆行@電視汁撈飯
本篇圖文獲作者電視汁撈飯授權刊登，未經准許，請勿轉載！
電視汁撈飯 facebook: https://www.facebook.com/tvsauce/
港生活人氣本地熱話
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
↓【限時搶⚡】Lanluis MGO520+紐西蘭麥蘆卡紅蔘蜂蜜便攜裝↓
↓補氣血｜改善睡眠品質｜促進腸道健康↓
