港人首派「公屋之王」想唔要？黃大仙高層單位 2大優勢冠絕全港！猶豫態度惹網民質疑：係咪晒命？

首派黃大仙高層單位 樓主竟表示「十五十六」

早前有港人於Facebook群組「公屋討論區」發帖，分享自己調遷首次獲派黃大仙上邨達善樓28樓單位，卻坦言對是否接受編配感到「十五十六」，因此發文徵求網民意見。

樓主其後補充，指今次獲派的是一人單位，並透露自己屬區內調遷，因此直言「區內調遷唔會有啟德」，意味可選擇的範圍有限，因此希望了解其他人的看法，再決定是否接受今次派屋安排。

網民大讚屬市區靚盤 2大優勢封為「公屋之王」

帖文曝光後，不少網民均認為今次獲派的單位相當理想，直言黃大仙屬市區熱門地段，無論交通、購物或日常生活配套都十分成熟，更有人將該邨封為「公屋之王」。特別是對一人住戶而言，屬相當難得的編配，直言「勁正，市區1人和諧式好搶手」、「得一個人，咁方便其實要考慮啲咩呢？」

網民留言

• 公屋之王嚟㗎
• 黃大仙上村都唔要
• 最好要啦，咁近地鐵站
• 得一個人，咁方便其實要考慮啲咩呢？
• 勁正，市區1人和諧式好搶手
• 咁方便都唔要，唔要後悔
• 黃金地段，地鐵站上蓋
• 交通方便，買餸方便，仲有要求？

樓主猶豫惹熱議 網民質疑「係咪晒命？」

不過，亦有不少網民將焦點放在樓主猶豫的態度，質疑對方明知單位條件不俗，仍公開詢問意見，有「晒命」之嫌，紛紛留言「位置咁方便，仲要28樓咁靚樓層，咪喺度晒命啦」。

亦有網民認為，是否接受單位始終屬個人決定，最重要是按自身需要及實際居住環境作考慮，留言表示：「唔明點解每次都要問其他人好唔好？」、「而家唔係其他人住，而係你自己住，自己去現場睇下咪知好唔好囉」，甚至表示「唔好要，重新申請吧！要新樓」。

網民留言

+2

點擊圖片放大

網友提醒放棄未必好：派順安邨就死

亦有網民提醒樓主，若放棄今次編配，下一次未必能獲派條件相若的單位，甚至有機會被編配至自己未必心儀的屋邨，因此勸樓主應慎重考慮，不要因一時猶豫而錯失機會。

有網民更半開玩笑留言：「自己買，等派澤安、象山邨」、「黃大仙都唔要，下次派四順」、「等澤安，風涼水冷」，藉此提醒樓主不要對下一次派屋抱有過高期望，否則最終獲派的單位，未必會比今次更加理想。

來源：Facebook@公屋討論區