新香港人，老香港人

文:  夏目貝

今朝放假，諗住落樓下食個靚早餐先出去做嘢，俾個好開始自己。平日我都去大快活食就算，今日冇咁多時慢慢飲咖啡，就改去翠河快手啪個麵算。

間翠河員工十個有八個都係口音唔正的阿姐，首先坐低好耐，叫咗幾次都冇人理，咁我明朝早真係好忙，咪嗌多幾次囉…好，落完單，等嘢嚟，等咗成十幾分鐘，我同枱對面個男人碗麵嚟埋食完都未到，咁我又叫阿姐催單啦。

姐：你張單呢？

我：你哋都冇俾單我

姐（不耐煩）：冇單點追啊？飲品未嚟咩？

我：未（你有眼睇架？）我點咗沙嗲牛太陽蛋公仔麵飲熱holick

呢個時候對面男人都出聲：我杯飲品都未嚟，嘢都食完喇！

個阿姐冇答一句轉身入廚房，10秒唔到我碗麵就到，我估佢係俾咗人哋枱嗰碗我先（咁亦解釋到點解成日漏單）。

然後飲品嚟喇

另一個姐：熱檸茶

我：唔係我嗰喎

姐：吓？咁你呢？（問男人）

男：我杯熱奶茶嚟嗰喎

我：呢度43號枱喎！

個阿姐就行開，行轉兩步轉頭

姐：咁holick呢？

我：holick係我嘅

阿姐擺出一個「咁你早講丫」嘅不耐煩表情擺低咗杯飲品。

冇嘢吓話？我鬼知邊杯係我架咩？可能係隔離枱架呢？

我食緊嘢嗰陣，又聽見隔離枱個阿姐同一枱師奶客拗緊張單問題，應該係阿姐落錯單嚟錯嘢，拗咗一陣，阿姐用勁過雷奧嘅霸氣講：你哋唔好同我拗！我唔會錯！係你哋記錯！

搞到好似佢先係投訴人咁，成班師奶都O嘴。

食咗一肚氣，埋單喇。櫃檯阿姐喺度對緊單，佢幫前一個客埋咗單之後，我拎張飛擺咗喺枱前。但隔咗一陣都唔見佢有反應（肯定見到我而唔係低頭埋首工作），我再推一推張單，講：埋單啊！

個阿姐竟然皺起眉頭，「苗」咗我一嘢！

X你個街，咪L收錢丫笨？

老式茶餐廳，可能坐得冇咁舒服，環境比較不衛生，但係D阿叔個個做咗十幾二十年，全部好熟手。食客坐低，即刻奉茶，然後落單俾個英文字佢，甚至講句「例牌」，就可以慢慢嘆下報紙等食，當然有時會漏單，但態度都唔會咁西。公仔麵之類快餐，5分鐘左右乜都上晒。

我細個住牛頭角，附近有檔上海麵，我小學中學都成日去食，個老細同侍應都認得我，記得我食開乜。而家間中經過都會去食，但一年可能去唔到一次，但係個老細一見到我，依然記得我食開乜，飲開乜。

我覺得呢D就是老香港人。

你話同小店老細比唔公平，佢哋自己生意會著緊D？

我想話，同一個商場嘅大快活，兩個收銀阿姐都做咗好多年。永遠笑瞇瞇對客，早晨多謝呢D禮貌做到足，仲會教你點配搭會抵食D。見到佢哋笑容，個人就會覺得開心。

我覺得呢D就係服務，而唔係下下當食客係豬咁餵，求其有嘢塞飽佢就算，請埋D咁嘅人，擺多幾部大電視都補唔返。

我來食嘢，唔係受氣。

本篇圖文獲作者夏目貝授權刊登，未經准許，請勿轉載！

夏目貝 facebook: https://www.facebook.com/josummer