拍拖前係寶，拍拖後係草，你唔係唔知掛？

文：小盛女

「聽聞尖沙咀有間德國餐廳唔錯，不如我地去試吓吖？」Mike說，那時他和Brenda仍然是同事關係。

「好呀。」Brenda微笑地說。

「7點半好無？如果OK我就即刻打去訂位喇我驚好full。」Mike說，並在Openrice找餐廳的電話。

「好呀無問題。」Brenda說，並心想呢個男同事又幾主動喎，嘻嘻。


追女仔嘛，主動細心當然最緊要，平日多點留意target喜歡吃甚麼，有甚麼興趣，然後投其所好，約吓食飯睇吓戲，如果可以一起學樂器或上course更佳，相處多了，慢慢就會開始熟稔，戒心亦會放下，久不久再送上一些小驚喜和小禮物，定必能搏得紅顏一笑，如果連輕微的身體接觸也沒有反抗，那成功機率應該都幾高，便可以進一步嘗試送佢返屋企。不過其實以上呢段都係廢話，計我話有feel大過天，無feel，我理得你係李嘉誠個仔啦！雖然Mike不是甚麼富二代，也沒有送上Pandora，但他與Brenda亦發展得很順利，所以約會了幾次便成為男女朋友了。

 
「今年我生日食咩好呀？」Brenda問，這是她第二年和Mike一起過生日。

「唔知呀，是但啦，搵嘢食你叻啲，平時都係你諗㗎啦。」Mike說，然後繼續玩Facebook。

「其實呢啲無話叻唔叻，我都係上openrice搵，平時我諗唔緊要，但係可唔可以唔好我生日都係我諗？」Brenda晦氣地說。

「咁我都唔知你想食咩。」Mike說，男人對不想做的事總會想到無數個藉口。

「算喇，食銅鑼灣嗰間xxx啦，聽講啲扒都OK。」Brenda說，其實她不是要吃甚麼五星級酒店自助餐或過千元的份子料理，她只是想吃一間由Mike親自選的餐廳。


「你book咗位未？」Brenda問。

「未呀。」Mike說，並心想還有兩天才到她生日，明天book也不遲吧？

「你仲唔book？好full㗎呢間餐廳，你唔諗同我食咩都算喇，可唔可以唔好我講埋想食咩你都唔去book位？」

「呢排做野忙吖嘛。」Mike說，他不知道忙其實是一個令人非常討厭的藉口。

「咁我諗你真係好忙，忙到連打一個電話既時間都無。」Brenda說，便頭也不回地走了。


拍拖前係寶，拍拖後係草，Brenda當然知道，朋友當初都勸說不要那麼快便讓男人得手，這樣他便不會珍惜，但她覺得喜歡便說喜歡，為何要扮愛理不理？那些甚麼whatsapp要覆慢一點字數要少一點她覺得簡直是無聊到極，所以她最後還是順著自己心意去做。其實二人相處久了，很多事都已成習慣，感情亦越來越穩定，進入老夫老妻階段，唔通仲日日要有驚喜咩？當然無可能，但只是特別日子做返少少嘢應該都唔係咁難掛？可能你會話要慳錢嘛，唔係點娶你啫？心思其實唔使好多錢，收到一張手畫嘅卡分分鐘係開心過收到一條Pandora(純個人意見，請因應伴侶自行調節)，「我唔識畫畫」、「手作仔呢啲我識條鐵咩」，嘥氣啦，講埋晒啲咁嘅藉口，一個字講晒：懶。你問心，如果未一齊，你知道心儀嘅人最鍾意手作嘢，你會唔會整吖？


「今個星期六不如去睇百日告別？The ONE 3點有場，我早啲出去買飛。」Mike說。

「嘩，轉性呀你？」Brenda說，並心想呢個衰仔終於做返啲嘢。

「嘻，我仲book咗我地第一次約會嘅德國餐廳，係咪好surprise呢？」Mike得戚地說。

「你而家講埋出嚟咪唔surprise囉傻佬。」Brenda說，並忍不住甜笑，其實女人有時真係好鬼易氹。


無論是熱戀期或老夫老妻的階段，久不久也為對方花點心思吧（男女亦一樣），因為維繫一段感情從來都不簡單，有時有啲嘢真係唔懶得㗎。

本篇圖文獲作者小盛女授權刊登，未經准許，請勿轉載！

facebook: https://www.facebook.com/littlevibrantgirl/