幾多男人俾「上進心」呢三個字呃咗
文：高教授
「矛盾只因深愛著 你知嗎 誰期望這刻擁抱完 然後吵架」
由踏入卡拉ＯＫ房間，Angela 就默不作聲地坐在一角，與正在興高采烈地唱歌的姊妹們大相徑庭。直到有人點選了這首《矛盾一生》，她才慢慢站起來，拿起 Mic 唱這首歌。
「回頭看最初多快樂 記得嗎 竟會沒決心成家」
唱到這句時，Angela 一下哽咽，雙眼通紅，唱不下去了。Angela 突然的落淚，姊妹們都紛紛上前看她。
「Angela 做咩喊呀？發生咩事呀？」
「我 …. 同 Kelvin …. 分咗手」
「分手？咁突然既，前排見你地兩個都好恩愛，仲話諗住結婚架」
Angela 與男朋友 Kelvin 分手的消息，一眾姊妹都不明甚解。
「我地原本係諗住結婚，但呢兩年以來佢一直都唔願意儲錢買樓，我叫佢去進修，增值自己，揾份人工高啲既工，佢又唔肯，懶懶閒咁，佢真係好唔上進，完全唔為將來作打算，我呢幾年真係好辛苦呀」
說到底，原來又是「上進心」的問題。
從前女人會希望男人有穩定工作，但不知何時開始，工作上的「穩定」已經不夠，取而代之的是「上進心」。「上進心」三個字聽起來很正面，似是看重努力向上的奮鬥過程。只要付出過，就算失敗了也值得嘉許。
可惜問題是，講出「上進心」的人，看重的其實是結果。如果直接了當說喜歡有錢人，聽起來很 cheap，但如果改說喜歡有上進心的，感覺就高尚得多。正如男人說喜歡靚女，就是膚淺，所以要改說喜歡順眼的。
「點解你咁唔上進，成日都安於現狀，你令我好無安全感呀，你有無為我地既將來打算呀」
上星期的周末，Kelvin 如常準備到色士風班做兼職導師。出門之際，被 Angela 叫住了腳步。
「Angela，買樓既問題我地討論過好多次，依家既樓價我都係負擔唔到架。就算儲到首期，以我既人工，去到銀行都過唔到壓力測試，銀行唔會俾我貸款架」原來他們又是為了買樓置業的事而吵架。最近雖然樓價跌，但一個小單位由七百萬跌至六百五十萬，這樣的跌幅對於基層出身，父母沒有積蓄可幫忙的 Kelvin 來講，依然是難以負擔的。
「其實兩個人係埋一齊，開心咪得囉，唔一定要買樓架，好似依家咁樣，租樓住都幾好呀」
「我年紀唔細架啦，我想有個屬於自己既家呀，你話想結婚，但又俾唔到一個家俾我，你叫我點嫁俾你呀」
有一個家，女人才可以嫁，這樣的對白，很像電視廣告。
「你成日話人工唔高，我叫你去進修，搏多啲晉升機會，你又話進修無用」
「Angela 呀，我已經日日做到隻狗咁，為公司仆心仆命，上年我經理走咗，諗住今年有機會升我，點知無啦啦空降咗大老闆個仔嚟做經理喎，我都好無奈」Kelvin 不上進嗎？不，Kelvin 其實很努力，每天都ＯＴ到晚上八點、九點。拼命三郎的工作態度，加上去年經理的離職，個個同事都認為 Kelvin 升職是理所當然，可惜世事往往事與願違。畢竟在香港社會，職場上的晉升從來都是取決於人事關係和際遇。「上進心」與「成果」，並不一定是掛勾的。
「我知呢啲空降二世祖係好乞人憎，成世靠老豆，無出色。我公司都有個二世祖嚟做我個部門既主管 …. 」
說到這裡，Angela 欲言又止。 她口中的二世祖主管，是她公司裡某位股東的兒子，最近正向她展開追求。
「Angela，我明白你好想有個家，所以我星期六日都唔休息，去做 part-time，教 saxophone，就係想賺多啲錢，買到樓之後先向你求婚」
職場上奮鬥多年，但事業仍然停滯不前。Kelvin 只好做兼職，幫補家計，完成 Angela 的上樓夢。
「我啲舊同學個個都嫁得好風光，老公有樓有車，我好羨慕佢地呀」
「你覺得我咁無用既話，咁你不如搵個買到樓既男朋友啦」
可能 Kelvin 已經氣上心，說出這句悔氣說話，而這句話一出口，大家都清楚，已沒有轉彎的餘地。
「咁好呀，我地分手啦」
Angela 拿起 Kelvin 的色士風，發洩的擲到地上，以這方式宣告分手。
「Angela，你分得啱呀，女人無幾多青春架咋，勉強同佢一齊無幸福架」
「男人窮唔緊要，最重要係有上進心，如果連上進心都無，咁就真係無得救」
「及早止蝕咪啱囉，趁仲後生，搵過個真係錫自己既人啦，你值得擁有更好架」
Ｋ房裡，姊妹們七嘴八舌，加鹽加醋。教人分妻，一向都是姊妹團的拿手好戲。
「當你遲遲未改變 就讓我改變吧 這個決定多可怕」
這天，已經分手的 Angela 將 Facebook 上的感情狀況轉為「單身」，並 post 上這句歌詞。第一個按 like 的人，就是 Angela 說的那位靠老豆、無出色的二世祖主管。like 完之後，他駛上名貴跑車去接 Angela，準備與她的第四次約會。前三次的約會，都是在與 Kelvin 分手之前發生的。
一直說自己是父權主義的受害者，卻又用父權的準則去要求男人。「上進心」這三個字，多可怕。
本篇圖文獲作者高教授授權刊登，未經准許，請勿轉載！
高教授Facebook：https://www.facebook.com/professor.ko/
港生活人氣本地熱話
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
↓【限時搶⚡】Lanluis MGO520+紐西蘭麥蘆卡紅蔘蜂蜜便攜裝↓
↓補氣血｜改善睡眠品質｜促進腸道健康↓
