肥仔@ERROR新歌《錯》首挑戰搖滾！預告下半年專注音樂 籌備個人Channel開Live演唱

與親密團隊聯手打造全新音樂形象

《錯》由肥仔與 Will、Jamie 共同作曲，T-Rexx 與肥仔聯手填詞，並由肥仔及 Will 共同擔綱監製。肥仔笑言平日大家較集中看他跳舞，所以今次下足功夫參與創作，希望呈現一個全新的音樂形象。為配合歌曲主題，肥仔特意在曲風中間加入一段沉靜的 Bridge 位，希望聽眾聽歌時能沉澱情緒，進入自己的意識海去思考何謂「錯」，以及如何拿捏與身邊人的關係。
談及新歌《錯》的創作概念，肥仔表示靈感源自 ERROR 曾經歷的一段低迷時期。當時團隊面對不少挑戰與失誤，啟發他思考「人如何面對錯誤」。

創作靈感源自ERROR低潮期

肥仔坦言自己性格固執，最初未必意識到問題所在，多得隊友阿 Dee（何啟華）親自點醒，說：「我今次首歌歌名叫做《錯》，人成日都會犯錯，但往往俾人鬧嘅時候大家都會垂頭喪氣。我覺得人應該勇於承認錯誤，今次我用咆哮式嘅方式認錯，想用一個豪爽嘅態度去面對。因為我哋 ERROR 其實都係『錯』嘅一種，歌詞入面『錯就是我、錯我亦犯過、錯就在我、我就是錯』，呢四句係我自己諗出嚟，好代表到我。」

自爆死牛一邊頸難承認不完美

肥仔分享道，人往往最難承認錯誤，但只要願意放低姿態，聽取身邊人的意見，才能有所進步：「按星座講我算係死牛一邊頸，好固執，最初自己犯錯係唔會覺嘅。後尾係阿 Dee 親口同我分析，我先意識到自己真係有錯、有做得唔啱嘅位置。」肥仔人要進步，就要勇於接受自己的不完美。願意放低姿態同人相處，其實好多事情都會順暢好多。

新歌MV上演舞台意外連連

拍攝 MV 當日，肥仔找來一班好友幫手。故事講述肥仔在台上演出時，整個過程不停出現意外與犯錯，令不少觀眾不滿離開，但一班忠實歌迷極力挽留，最終肥仔憑著堅持做出精彩演出。

導演暗中召集好友驚喜力撐

拍攝現場更出現不少驚喜。肥仔本來只私下邀請了兩三位好友，沒想到導演暗中召集了他整班打 Pickleball 的好朋友前來情義相撐，當中包括：談善言、楊天宇（Angus）、黃浚銘（波仔）、黃溢濠、葛綽瑤（Yoyo）、周芷慧（阿提）及李煥林等。肥仔感嘆道：「今日最驚喜係 Angus，佢喺角色上面發揮得淋漓盡致，演技簡直大爆發！波仔個角色亦好適合佢，拍嘅時候我笑到飆眼水。大家咁力撐，我真係無以回報，基本上請食飯係基本啦，我帶佢哋去食嘅一定唔會差！」

2026下半年重心全面聚焦音樂

對於未來的發展，肥仔透露 2026 年下半年將會把重心全面放在音樂事業上。除了正在籌備的下一首個人單曲外，他亦開始經營個人 Channel，說：「我今年嘅 Plan 仲會有一首 Solo 歌。另外呢排自己開始搞緊一個 Channel，主要想唱下 Live 同大家傾下偈。自己唱 Live 嘅機會未必真係咁多，所以想自己衍生一個平台出嚟，多做音樂相關嘅嘗試。只要有人鍾意聽，過嚟傾下水玩下我都好開心。」

Fatboy - 錯 MV