毛記電視，你係得嘅！

文：B612 

唔洗多講，我諗今晚好多香港人同我一樣，過咗好開心、好爽、好感動嘅一晚！

而榮耀，當然係歸比毛記電視（同Shell）（同NOW）啦。

由一開始搞黑紙，到100毛，到毛記電視，呢班人每一次都令我瞠目結舌，同埋，佩服，由衷佩服。

今晚個Show，有幾樣嘢不得不講。首先係好厲害嘅關公。究竟要做出咩成績令人真心欣賞毛記，先至會請到民望好高嘅方健儀、何韻詩、盧海鵬、俞琤、河國榮等等數之不盡，本土公眾人物做嘉賓，等大家喺屋企睇到噴晒飯咁興奮、咁有親切感。第二係佢哋付出嘅心機，每一首強行填嘅歌詞，都用自嘲嘅方式道盡香港而家嘅水有幾深、火有幾熱，雖然其實有D真係無聊到我標晒眼水。同埋最重要的是，係佢哋真係面向觀眾，成晚嘅內容都係務求令香港人有共鳴，笑到碌地！

之前維基搞香港電視，牌發唔成，差唔多十萬人要集會要盛咁，可見大家係幾咁想要自己嘅電視台。但真心（膠），我覺得今日係比毛記做到咗 —— 真正香港人嘅電視台。今晚係有幾多人一心趕收工，返屋企、去天橋睇直播轉播？維基嘅認真，係認真做堅嘢；而林日A等人就更加正，因為佢哋係認真做X嘢。

某程度上，我覺得毛記直情係代表咗香港嘅精神。睇死我係大大台搞唔起？就整壇真·伊館分獎典禮你嘆，唔夠你鬥咪玩吓囉唔係咁小氣呀你。唔夠財力咩？就靠真本事、創意同埋誠意，搵到Shell贊助，仲要令到一眾Fans都真心投向Shell，自發撐佢哋，直頭好似鋤強扶弱嘅Batman咁贏盡口碑。唔發牌比我又如何，網絡廿三條又如何，豺狼當道又如何？香港人同小強一樣，咁易比你打得死咩。

唔單止唔會死。我個人最欣賞嘅，係佢哋將港式幽默發揮得淋漓盡致。點解毛記電視咁受歡迎呀？當大家都開始習慣呢煲溫水，唔知可以點做嘅時候，毛記分獎典禮就係想話你聽，主旋律唔一定要跟，要從頭熔掉社會搵錢的信仰，唔好向強權屈服。大佬，個社會咁癲，唔笑吓點捱先？

去到臨尾一首歌，D感動位真係出晒嚟。毛記將男歌手獎頒咗比大家心目中真正符合「香港人」定義嘅河國榮 —— 就係咩國籍，只要你真心鍾意呢個地方、尊重呢到嘅文化，同我哋齊上齊落，就歡迎你加入香港人嘅一份子。毛記嘅心意好明顯，就係無論經歷幾多荒謬都好，唔可以盲目，唔可以灰心，唔可以放棄呀香港人！因為……

「同熱愛這片土地 大家刻骨銘記

愁或喜 生與死 也是香港地。」

最後，有請小鳳姐！（頂佢真係連小鳳姐都請到！）

本篇圖文獲作者B612授權刊登，未經准許，請勿轉載！

B612 Facebook：https://www.facebook.com/b612lpp/

>> 毛記分獎禮廣告位　3大直播沒出街片段曝光 

>> 聽到眼濕濕！毛記分獎禮河國榮MC仁合唱《真。香港地》