AEON職員叫顧客「姐姐」遭寫紙投訴！指做得到阿媽？店長高EQ手寫回覆獲全網讚爆

文: 梁雪盈

1小時前

【AEON職員叫姐姐 / 顧客投訴 / 店長手寫回覆 / 香港稱呼文化】對於香港服務及零售業工作者來說，到底點稱呼女顧客最保險？近日 Facebook 群組熱傳一張來自 AEON 的「顧客心聲」告示圖，有女顧客寫紙投訴店員無禮貌，指自己被一名「睇落 50 幾歲」的阿姨店員稱呼為「姐姐」，讓她大感被嚇親及不尊重！事件隨即引發全網熱議，而店長事後以一手超靚手寫字、文雅且得體的回覆，更獲大批網民力讚高 EQ！

叫「姐姐」都被投訴？女顧客嬲爆：佢睇落50幾歲做得到我媽

香港作為「投訴之都」，連一句稱呼都可能隨時「踩地雷」！近日有網民上載一張 MegaBox AEON 的「顧客心聲」與「店長的話」照片。紙上顯示，有女顧客寫信投訴店員態度問題，表示「覺得啲職員可以有禮貌啲，以前行開藍田啲職員好好人好有禮，其實呢度啲姨姨都 OK，但唔建議叫人『姐姐』！呀姨睇落 50 幾歲，做得到我呀媽有凸，但叫我『姐姐』我真係嚇親同埋會覺得冇禮貌。」除了稱呼問題，該顧客亦順帶投訴價錢牌錯位導致結算過程不流暢。

店長神級高EQ手寫回覆！「實屬久久積習」獲網民全網讚爆

面對顧客對稱呼的強烈不滿，AEON 店長以一手極為工整文雅的手寫字親自回覆：

「敬重的貴客：敝店同事的待客態度及對顧客的稱謂而令閣下不悅，深感抱歉，已通報各同事盡量以 Miss 或小姐等沒太大輩份的稱呼；日後如有再犯，實屬久久積習，一時三刻未能改掉，敬請見諒。至於價錢錯誤而令閣下久等，再次懇請見諒，會繼續努力改善，減少人為出錯的可能。再次多謝閣下之來函指導，謝謝！」

店長的回覆既表達了歉意，同時溫柔地維護了員工，一句「實屬久久積習，一時三刻未能改掉」更被網民大讚文雅又有修養。

網民熱議分析稱呼暗藏文化陷阱？

帖文曝光後，隨即引發大批網民留言熱議。有網民力撐店員與店長，「店長字好靚，回覆好有禮貌得體」、「阿『貴客』叫人阿姨都得，人哋叫佢姐姐就唔得」、「叫姐姐都唔得，崩口人忌崩口碗，可能以為叫緊工人姐姐」、「叫得姐姐都係想親切啲姐」；亦有網民笑言「男嘅叫靚仔，女嘅叫靚女最安全」、「叫 Miss 或小姐最好」。