MIRROR官宣12月亞博8場演唱會！全新團歌《Fight Club》登場 王雙駿發掘12子狂野「爛仔聲」

官宣 12 月亞博 8 場演唱會

MIRROR官宣演唱會將在12月11日至13日、15日至18日、20日共八場，在香港亞洲國際博覽館舉行，同日特別推出全新團歌《Fight Club》，新歌由王雙駿（Carl叔叔）作曲、編曲及監製，梁栢堅填詞。

新歌以硬朗重型曲風為基調，旨在傳遞打破規格與自我執念的理念。Carl叔叔更在錄音過程中特別為12位成員發掘前所未見的粗獷聲線，配上MV中熱血連場的武打場面，為樂迷帶來震撼的視聽體驗。

今次新歌《Fight Club》特別注重展現12位成員硬朗一面。隊長Lokman（楊樂文）介紹歌曲班底與概念時表示，歌曲希望帶出打破規格的態度，因此Carl叔叔採用偏向Rock的風格，並引導大家的聲音走向粗獷與狂野。Lokman道：「錄完有一個Take，Carl叔叔即刻話『今次呢個Take好爛仔啊，好正！』佢不斷喺度發掘一啲大家12個都未出現過嘅聲音，出嚟嘅成果連我哋自己都好驚喜。」

王雙駿讚「呢 Take 好爛仔」

對於今次要展現全新聲線，成員們均覺得過程十分有趣且富有挑戰性。姜濤（姜濤）坦言最初有些少迷惘，但很快掌握到方向：「係自己未用過嘅聲音，係一個好棒嘅體驗，希望以後可以喺自己嘅作品用多啲呢把聲。」

Edan（呂爵安）則笑言每次與Carl叔叔合作都能發現新驚喜：「今次Carl叔叔不停指導我哋試唔同嘅演繹，要再惡啲、再行啲，聽到成品覺得好得意。」

Ian（陳卓賢）亦指新唱腔非常符合歌曲Mood：「硬淨嘅聲音令到歌曲整體聽落去，更具備同人對戰嘅勇悍感覺。」

成員齊讚聽返 Playback 超有火

Alton（王智德）更還原錄音室內的緊張氣氛：「當時我企喺咪前面，同Carl叔隔住塊玻璃，佢不斷叫我投入啲、奔放啲，要加多兩分聲嘶力竭，最後12個人嘅聲音撞埋一齊，剛好呈現出最完美嘅畫面。」

Stanley（邱士縉）同樣覺得過程刺激：「今次用咗較多Energy去唱，Carl叔又一次發掘到我嘅潛能，非常之好玩。」

Jeremy（李駿傑）則認為這次嘗試能為歌迷帶來驚喜：「聽返大家嘅Playback覺得好神奇、好有火，對於Fans嚟講會聽到一個全新嘅態度。」

AK 展現舞蹈底子流暢拆招

除了音樂上的突破，今次《Fight Club》MV亦落足苦功。團隊特別安排成員在廢棄街市及貨櫃場進行實景拍攝，更是繼電影《12怪盜》後，12位成員再次挑戰大量真功夫打戲。眾人於拍攝前一天進行密集式動作訓練，正式拍攝時更要即學即練，上演多場以一敵眾的精彩場面。

AK（江𤒹生）透露今次每位成員都有獨立的打鬥鏡頭與專屬招式：「因為有跳舞底子，記招數比較容易，所以拍攝過程好順暢，試幾次就搞掂。」

Jer（柳應廷）今次更有「一打十」的重頭戲，他笑言現場非常投入：「平時睇得多拳擊比賽，今次真係實踐到好爽！雖然拍攝前大家擔心我表情管理，但Action一到我落足100%力同眼神，即刻打破大家嘅顧慮。」

Anson Lo（盧瀚霆）則透露自己拍攝solo打鬥時已是凌晨兩、三點：「要打人又要踩人，雖然所有武師都做足安全措施，但每次拍動作場面我都好驚整傷對手，不過大家都好專業，感覺好爽。」

MIRROR 時間限制逼出一 Take 過爆發

拍攝當日天公不作美，突然下起狂風暴雨，導致原定部分室外場景必須臨時轉移至室內拍攝。Frankie（陳瑞輝）坦言雖然有點可惜，但非常感謝團隊即場應變：「雖然改去室內拍攝有啲可惜，但大家都做得好好，如果仲有咩想發展，其實我仲有好多貨，大家可以搵我拍多啲打戲！」

由於時間與天氣限制，部分動作場面最終只能以一Take過完成。Tiger（邱傲然）感嘆拍攝過程雖然有遺憾，但亦非常充實：「突如其來嘅大雨令到大家更集中，全日練嘅動作喺嗰一Take爆發出嚟，過程好玩又難忘。」 12位成員在逆境下展現出極高默契，順利完成這首熱血之作，為即將到來的演唱會正式揭開序幕。

MIRROR 《Fight Club》MV