點用電話最慳電？
文：藍橘子
【不知恥日常】點用電話最慳電？
今日例牌遲到，老闆問我點解。其實有乜點解吖～咪求其搵個藉口氹吓佢老人家開心。
「電話無電，所以鬧鐘無響。」
「你班廢青乜都靠個電話，電話壞咗就同個廢人無分別。」
其實老闆你無咗班員工，都係廢老一條，但當然啦我無講出口，我只係不停點頭：「係啊係啊。」
「洗唔洗我送個鬧鐘畀你啊～送鐘啊！哈哈哈哈！」
「哈哈哈，點解老闆你可以諗到啲咁好笑嘅gag？我出去執返條橫丫腸先。」我笑到彎晒腰捂住個肚行返出老闆房。
正當我坐返埋位，諗住終於可以嘆返個早餐嘅時候，Marketing 部門Adam就行過黎，一手拎起我電話仲拎起我隻手指解鎖，然後就不停撳撳撳，由於我食緊早餐所以就由得佢搞。
相信每間公司都有一個固定組合，成日講笑話但唔好笑嘅老闆，多管閒事懶係博學嘅Marketing，一個由你入職嗰日起就話想辭職，但辭九世都下唔定決心嘅老屎忽。
「搞掂喇！幫你熄咗好多嘢，咁樣會慳電好多…」Adam懶叻咁放低部電話就行開咗。
起初我都不以為然，Adam成日都喺公司自稱gadget小王子。但當我到下午想偷懶玩吓電話就發覺唔對路，又上唔到網，螢幕又暗…於是我就拎住呢部好陌生嘅電話問Adam到底搞咗乜。
「係啊，我幫你熄咗大部分功能，到你想用就開返，唔用記住熄。個mon最暗就唔食電，你行去黑啲嘅地方就會睇到嫁啦！慳電嘛。」
「…」我攞起Adam部電話熄咗佢。
「喂你做乜熄我部機啊？！」
「咁樣先最慳電，你有用咪開返佢囉。」
其實做人同用電話都一樣，咁長命無用，最緊要喺你仲生存期間做過乜嘢。
好多人埋怨自己生活不如意，但有冇做過任何一樣嘢去嘗試改變佢？
本篇圖文獲作者藍橘子授權刊登，未經准許，請勿轉載！
藍橘子Facebook：https://www.facebook.com/BlueGodZi/
港生活人氣本地熱話
【免費試用🎁】RMK零毛孔素肌底妝系列！
↓☀️夏日必備防曬霜 x 皇牌輕透粉底液！↓
【請您去】iSQUARE國際廣場「爆」趣童玩之旅💥
↓ Striking爆炸糖Strikids(爆炸仔)小隊✨ + 本地懷舊玩意元素🙌 ↓
