遇到個鍾意食譚仔嘅另一半，係幸福嘅
文： 有心 無默
某次聚會傾到平時同另一半去開邊到食飯。兄弟A開始大吐苦水，話拍咗咁多年拖，諗食乜開始難過諗買邊隻股。「真係同網上面啲片一樣架！叫我提議，打邊爐就話熱氣！韓燒就話會爆瘡！放題就話食唔到咁多嘢！其他呢，又話我無誠意！」
兄弟B聽完當堂笑一笑，以勝利者姿態講咗嗰日嘅金句：「好彩我搵到個鍾意食譚仔嘅女友。」
雖然我嗰陣主要係食花生。但確實係從心底裡面同意兄弟B。老實講，而家嘅譚仔真係比唔上當年，要罵大把位可以罵，比佢好食嘅店亦都唔少。但以性價比嚟講，譚仔確實稱得上係港人嘅恩物，周街分店更加令佢成為拍拖嘅良伴。如果另一半同自己一樣都係咁鍾意食，咁成件事就真係不得了。
首先，真係免去咗好多煩惱。某程度上，譚仔一樣係熱氣一樣係肥一樣容易爆瘡一樣係無乜誠意嘅選擇。但大家鍾意吖嘛，只要有愛，任何嘅問題都唔再係問題。
其次，當然就係慳唔少錢。我識唔少女仔都好開通願意同男友AA制，但身為一個男人，好多時都想表現出風度主動埋單。但今時今日香港食乜都貴，有時一次韓燒兩個人加埋已經夠食走一日糧，諗起其實相當肉赤。啦，譚仔就唔同啦，一人一碗加嘢飲連埋小食，其實都係百零蚊鬆啲。真係食得開心，埋單亦都埋得開心。
第三，固之然係當中嘅樂趣。聽完你可能會呆一呆，譚仔都有？唔好玩啦。當然有，本身落單聽下阿姐經典鄉音「懶肉勿演畜生山小罅找搞芽加凍撚死」，好笑之餘已經夠討論一餐。再者，好多細節位仲可以無形中增進兩人嘅感情…
以下為真實眼冤對話實錄：
（一）
「一碗我食唔哂架喎，不如我叫少米線囉？」女方問。
「唔好啦…分俾我咪得囉，我大食嘛。」男方回答。
「咁不如你叫第二隻湯呀，我想試下味呀！」女方再提議。
「好好好…」男方好順攤。
眼冤。
（二）
「喂，我食完蒜泥白肉你仲敢唔敢錫我架？」女方問。
「唓，嗰晚我食完榴槤妳都敢錫啦。」男方笑住講。
「嘻嘻，咁又係。 」
眼冤。
（三）
「點解雞翼大細都係單數架，都唔知點分好。」女方苦惱。
「無所謂啦，妳鍾意食吖嘛…細咪妳兩隻我一隻，大咪妳三隻我兩隻囉。」男方溫柔咁講。
眼冤。
「大肚肺街亦。」無耐土匪雞翼就到。
「唔得，我都係要食哂。」女方突然改變主意。
「吓！？！留返隻俾我啦。」男方驚訝。
「你咬我食淨啲骨就夠啦～ 」
「阿姐，埋單呀！！」當時嘅我終於睇唔過眼彈起身大嗌。
「o靚仔，埋單出去埋呀…」阿姐回答。
「呢個時候口音先咁準！」
所以話，識到鍾意食譚仔嘅另一半，真係幸福架，要好好珍惜。
唉…呢種幸福幾時降臨到我身上？嗚嗚… 我喊…係因為畀特辣辣親…絕對唔係因為寂寞…嗚…
最後利申返，非打手文。純粹係食咗十幾年譚仔，睇住佢由三間分店，分家到而家幾十間分店，連屋企樓下都開埋，所以有感而發。
本篇圖文獲作者有心 無默授權刊登，未經准許，請勿轉載！
有心 無默 Facebook：https://www.facebook.com/Echo.of.Heart/
港生活人氣本地熱話
↓【限時搶⚡】森源安睡足艾貼↓
↓吸走體內毒素｜改善血液循環 ↓
✨大派120盒艾草溫熱舒壓貼✨
↓ KO肩頸／腰背痛💆、改善手腳冰冷、舒緩疲勞！↓
