璀璨之城角色｜江美儀張智霖2分鐘演技巔峰對決！眼神瞬間黑化一秒假笑變暴怒

2 分鐘演技巔峰對決 

昨晚最精彩一幕，絕對是張智霖與江美儀在醫院的 2 分鐘「巔峯演技對峙」。江美儀每個細節位都做到一絲不苟，絕對無負視后之名；而張智霖則完美示範了如何「唔使爆 Seed 發癲，都可以一嘢激死人」的最高境界。面對張智霖殺到埋身，美儀姐先是笑住向上望，然後便全程望住地下，兼語氣平靜地句句有骨寸爆張智霖，張智霖則一副挑機樣勢要辣㷫江美儀，二人的「機心 VS 扮傻」劇力萬鈞、張力十足。

點擊圖片放大

江美儀一秒假笑變暴怒狂揪衣領

丁麗明：「唔該你借借，你阻住我呀。」孝賢：「你唔認得我呀？我認得你喎，你化咗灰我都認得你喎」丁麗明：「你係邊個都唔應該阻住我，唔該你借借吖。」孝賢：「我係嚟接你返屋企架，大媽。」丁麗明：「屋企……有我嘅地方就係屋企，呢度有我，係屋企（指地下），你可唔可以唔好踩住我屋企。」為了進一步刺激丁麗明，孝賢下跪趨前望著她，並邊奸笑邊以輕蔑眼神繼續開火：「你到底真癡定假傻？」面對孝賢升級進逼，丁麗明亦霸氣地轉為定睛望著對方：「真同假你識分咩？」眼見丁麗明如此倔強，孝賢最終出「大絕」，指孝君「瀨晒嘢」：「佢好快連主席都冇得做」。

點擊圖片放大

皮笑肉不笑眼神瞬間黑化

由於丁麗明向來視孝君為心肝命掟，當從孝賢口中聽到孝君出事時，眼神中的笑意率先消失，只剩下「皮笑肉不笑」的嘴；之後愈聽愈火滾的丁麗明，眼神開始殺氣漸露，最終她激動地揪著孝賢的衣領瘋狂拷問，先是輕聲的：「你對佢做過啲咩嚟？」，之後再咬牙切齒怒吼：「你對佢做過啲咩嚟呀！」至於成功激嬲丁麗明的孝賢，則全程猙獰奸笑，二人一起一伏對決堪稱高手過招，絕對是《璀璨》的經典場面之一。