做阿Lam個唱嘉賓好搞鬼！小鳳姐5分鐘talk笑爆全場

林子祥一連四晚於紅館舉行《佐治地球40年演唱會》完滿結束，阿Lam每晚都請來不同嘉賓，大晒人情牌，而尾場更請到殿堂級歌后徐小鳳粉墨登場，小鳳姐一出場就大放笑彈，當阿Lam表示同小鳳姐過往已經合作許多次，小鳳姐就開玩笑埋怨自己邀請對方合作時卻遭托手踭，令阿Lam當堂口窒窒。

之後，扶住小鳳姐行的阿Lam稱擔心踩到她的裙尾，小鳳姐即時作出絕秒回答：「唔緊要，我畀人踩慣，我哋唔怕畀人踩，我哋經得起風浪，特別係我哋香港人，香港人係特別經得起風浪，香港喺最世界嚟講係一個最大方、最包容嘅社會，唔理你幾有錢幾窮佢都一一收晒你，所以我好鍾意香港，因為我係香港人，我係地地道道嘅香港小姐！」令觀眾拍爛手掌。

越講越high的小鳳姐更搬「Lam仔」上台，她對阿Lam說：「一路睇你嘅騷我本來有啲疑問，今日我睇完啲相之後終於解開晒，原來你嘅仔真係你嘅仔嚟！」說罷小鳳姐自己都忍唔住笑到跳跳紮，同身旁畀唔到反應的阿Lam形成強烈對比，觀眾就看得更開心，笑聲此起彼落，兩人其後合唱《星光的背影》等經典金典，令全場氣氛高漲。