熱愛優質生活
首頁   \   港熱話   \   老友,好懷念以前一齊打波嘅日子

老友,好懷念以前一齊打波嘅日子

2016.02.15

 文: 有心 無默

 

每次經過中學聽到裡面傳嚟打波聲,都會忍唔住擺低耳筒,企喺外面細心聽一陣。

 

老友們,仲記得嗎?當年無憂歲月,每日放學鐘聲一響都會即刻衝落球場。無視老師嘅反對,著住校服皮鞋、解開喉鈕拉開衫腳、拎起個籃球就嚟料。夠人三打三係基本,難得嘅係叫齊十個打全場。結果一打就打到天黑,成班人身水身汗咁走去便利店買嘢飲,途中討論下邊個打得最好,恥笑下邊個用臉嚟接波,嘻嘻哈哈咁又一日。

 

快樂日子總係過得快,上到高年級開始重視返學業,叫得郁一齊打波嘅人就變得越來越少。去到應考年,每日放學對住嘅仍然係書本。雖然球場依舊傳嚟拍波聲,同埋皮鞋擦過球場發出嘅吱吱聲,但場上嘅靈魂人物,早就換咗第二班人。

 

數一數,對上一次約得齊人打波,已經差唔多十年前。而家難得約到出嚟,都係食飯傾計,打波?唔好搞啦…

 

仲記得,有次喺學校外面聽得感觸,心血來潮拎起手機送出一個短訊。

 

「喂,不如搵日放假約出嚟打波囉?」

 

「邊有精神?晚晚九十點先放工,個老闆無人性架…放假都休息啦。」

「六日都要陪女啦,推要跪玻璃…」

「唔得啦,之前做完小手術,你地打啦。」

 

原來,可以一班人打波,係一種有時限嘅幸福。

 

過了,老了,就結束了。

 

仍然叫得郁一班人嘅你,請珍惜呀。

 

本篇圖文獲作者有心 無默授權刊登,未經准許,請勿轉載!

有心 無默 Facebook:https://www.facebook.com/Echo.of.Heart/

 

作者其他文章:

>> 我係死神,一個平凡嘅香港打工仔

>> 遇到個鍾意食譚仔嘅另一半,係幸福嘅

>> 我喺老麥向女友求婚,幾乎搞到悲劇收場 

 

內容評分
評語