由初相識乜都「第一次」，演變成去邊都係「老地方」
文：藍橘子
最初同女朋友一齊，成個生活由一變成二。
覺得做乜都好有新鮮感。
「我哋第一次兩個人去睇戲啊～」
第一次同佢去睇戲，兩個人食同一桶爆谷，隻手唔小心掂到都尷尷尬尬咁縮開，又借勢話「係咪好難拎呢？我坐埋啲！」
拉起兩個座位中間阻鬼住晒嘅手柄，靠近坐埋去：「係咪易拎好多呢！以後都咁坐喇好無？」
老實講，中間支死人柄頂鬼住我背脊，座椅中間條GAP又搞到我兩瓣屁股一高一低，話舒服就係呃人，不過為咗靠近女朋友，無計…
「我哋第一次兩個人食打邊爐啊～」仲要係麻辣火鍋添…
去邊食飯都係一門學問，好彩我係垃圾桶黎乜都食，所以任得女朋友話事。佢好鍾意食辣，辣我唔係唔得，但我平時食開ＢＢ辣嗰吓慘呢，佢就食開中辣…
經過無數咁多鼻涕同淚水嘅洗禮之後，而家我都食到中辣，Yeah。
「我哋第一次兩個人去長洲啊～」自從佢試完長洲糯米糍之後，長洲就變成同女朋友嘅拍拖聖地。
一齊嘅日子愈耐，就愈多第一次。
兩個人去唱Ｋ，兩個人去網吧通宵打機，兩個人去旅行…
兩個人一齊做嘅每一件事，去過嘅每個地方，都好似被施魔法一樣變成「禁區」。
當我一個人就完全唔想去。要去，就兩個人一齊去！
漸漸我發覺到，我個生活又由二變返一。唔係變返一個人，而係同女朋友兩個人生活幾乎完全重疊，無辦法分割。
睇戲會自動痴埋一齊坐，會爭爆谷食，但最後都係食唔晒。
試新餐廳口味會100%一致，一齊讚一齊彈，去過嘅餐廳都充滿住回憶。
太子間「金鳳茶餐廳」幾乎每個月都會去，無錯啊扒無肉味又多鬆肉粉，坐得又逼，入面好似焗桑拿咁。
金鳳係第一次約會帶佢去食嘅餐廳，或者因為咁，我同佢都好鍾意去，食完個身又臭口又臭，但照樣捉住佢個頭黎聞。
好多人都驚時間耐咗會無晒新鮮感、會厭、會悶…
但其實由「第一次」變成「禁區」，最後轉化成屬於我哋兩個人嘅「老地方」。
又係另一種甜蜜囉。
本篇圖文獲作者藍橘子授權刊登，未經准許，請勿轉載！
藍橘子Facebook：https://www.facebook.com/BlueGodZi/
作者其他文章：
>> 點解我搞親乜爛Gag，女朋友都會笑
港生活人氣本地熱話
【送禮🎁】送Esther Bunny春日好物🐰！
↓ 登記免費帶走可愛折疊傘 x 保溫杯 ↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
