熱愛優質生活
首頁   \   港熱話   \   有冇搞錯啊要我拎手袋!我仲洗出黎行?

有冇搞錯啊要我拎手袋!我仲洗出黎行?

2016.02.26

文:藍橘子

 

 
『你幫女友拎手袋啊?!係咪男人黎嫁?』
 
有個朋友曾經咁樣恥笑過我。佢仲表示如果佢女朋友叫佢拎手袋,佢會頭也不回即飛咁話。呢個咁大爭議性嘅話題,到底拎好定唔拎好呢?如果唔拎,女朋友會唔會覺得我好無風度?如果拎…萬一畀人笑點算?
 
不過對於機智、賢淑、美貌與智慧並重嘅女朋友小豆,就完全無呢方面嘅煩惱。
 
「我唔想你畀人笑啊。」當下我聽到時,覺得自己係全地球最幸福嘅男人。
點知佢下一句就講…
「你有帶背囊咁就啱晒,我有嘢畀你幫我放入背囊。」
「…」女朋友真係聰明絕頂,竟然諗到呢個方法。(難怪佢會識到我)
 
當時我先見識到,原來女仔個手袋並唔止得一個袋。
手袋入面仲有好多個細袋,每個細袋都分門別類,看似好整齊,但又會唔記得啲嘢放喺邊個袋。
 
「我仲帶咗支水夜晚食完甜品飲。」
「又帶定多幾包紙巾費事你鼻敏感打十幾個乞嚏~」
「仲有把遮!夜晚好似話會落雨。」
 
雖然佢無提及塞落我個袋嘅化妝品、潤膚膏同鎖匙包,但既然女朋友都講到咁貼心,我唯有照單全收,我本身帶個背囊其實為咗放部notebook,而家幾乎次次出街我就好似一個錦囊人咁,個背囊應有盡有,仲開始記得每個錦囊入面擺咗乜法寶添。
 
自從呢次之後,我幾乎每次出街都帶背囊,好多朋友都奇怪點解一個男人老狗,背囊會有紙巾、濕紙巾、環保袋、冬天有暖包、叉電器、紙、筆、遮(小王子遮,好鍾意用)、仲有一支自拍棍(粉紅色)。
 
如果朋友問點解。
我通常都會答:「因為我有女朋友囉!」
 
其實幫唔幫女朋友拎手袋,最重要都係雙方心態。男方唔好覺得自己樣衰、無面、狗奴才…根本唔需要理其他人點諗。唔通你唔記得帶遮,女朋友帶咗把粉紅心心美少女戰士遮,條街風大雨大你又叫個女人擔遮遮埋你咩?!
 
女方點諗亦好重要,如果出於奴役男友嘅女皇心態,或者考驗佢可以受妳操控到咩地步…夾硬由「Prince & Priness」變成「Queen & Slave」,除非兩個都好享受呢種關係,咁樣對雙方都唔太好啦。
 
不過係互相尊重嘅話,都唔會想佢畀周圍嘅人指指點點嘅。等同男人就算幾咸濕都好,都唔希望女朋友出街著得性感啦。
 
『嫌重就咪帶出街啦!』我相信仲存在一班「寧分手不拎袋」的硬漢子。
 
硬漢子們千萬唔好忘記,你身邊呢個女仔將來可能會拎住一個,同你個樣有50%似嘅人仔,托足八個幾月,再痛到驅魔人鬼上身咁屙佢出黎。卸完個人仔之後,唔等如你返屋企丟低個手袋一身輕,仲要忍受好多後遺症,身材走樣、體質變差、失禁、抑鬱、腦筋唔靈活等等…
 
不如咁,掉返轉,女人幫男人揹袋,但男人生仔。
我估應該有99%女人願意。

 

本篇圖文獲作者藍橘子授權刊登,未經准許,請勿轉載!

藍橘子Facebook:https://www.facebook.com/BlueGodZi/

 

作者其他文章:

>> 由初相識乜都「第一次」,演變成去邊都係「老地方」

>>  點解我搞親乜爛Gag,女朋友都會笑 

>> 食譚仔悟出真諦,難怪我一直咁窮

>>(老實)我鍾意同女朋友傾電話多過whatsapp…

>>同女朋友鬧交唔緊要,唔好隔夜就得喇!

 

內容評分
評語