當女朋友學識淘寶，就係中伏嘅開始

文：莎比亞

自從她興奮地說了句：「我學識咗自己淘寶喇！唔使再煩你！哈！」我便知道那笑得瞇著眼，扯著我恤衫的她，將陷入萬劫不復的誘惑困境。尤其是她那喜歡購物卻又節儉的矛盾性格，我已想像到她聚精會神在螢幕前，全神貫注在那網頁的搜尋引擎不停輸入「顯瘦連身裙」、「英倫風短裙」、「簡約風外套」等等。網頁關上前，那句「咁平，一於買啦！」出場了起碼過百次⋯⋯在一小時內。
她： 「做乜你都唔開心嘅？自己女朋友咁聰明喎！唔使再阻住你打機睇波。」
我： 「開……開心呀！以後妳咪可以瘋狂Shopping囉？」
她： 「放心喎！真係鍾意我先會買。」
我： 「我擔心嘅唔係妳『加入購物車』嗰半秒唔係真心鍾意呀⋯⋯」
她： 「咁擔心啲乜？」
我： 「驚妳買完，件嘢送到嚟睇到實物會失望啫！」
她： 「唔驚啦！有得睇佢啲Comment、信譽嗰啲㗎嘛！」
「咪一樣中伏！」我當然沒有說出來，而是識趣地釋出善意：「唔好諗咁多喇，最緊要都係妳買到心頭好嘛！買咗先算啦！」

她閉上眼，挽著我的手臂，挨在我肩膀，我知道我答對了！呼~未認識我之前，她是個購物狂，買衫買鞋買護膚品盡顯愛美的天性。但她花的一分一毫都是一手一腳靠著一份份Part-Time、一份份私人補習賺回來。我問過她，何時開始幫人補習？她說，中五。我再問，那妳還做過甚麼工？她再說，樓上Café、大型連鎖時裝店、書店⋯⋯等等。因為家境不太富有，也因為自己賺的錢花得較爽。
我： 「咁點解而家咁慳先，搞到我好似好刻薄妳咁！」
她： 「因為啲錢用喺其他地方仲開心囉！」

例如和我一起去旅行、間中給我驚喜，送一本我喜歡的書、買一件襯我的恤衫給我，買一嚿質地較好的冷球織頸巾給我、上甜品班，然後在約會時突然捧個蛋糕出來叫我試食⋯⋯
「我最鍾意見到你收禮物嗰個樣！開心到成個小朋友咁！」她的口吻，極像一位為老公打點完一切，除下圍裙鬆一口氣的貼心賢妻，不用撒嬌，也教人心軟想一輩子擁著她，讓她當最好命的女人，不過⋯⋯

學會自己淘寶的她，在一星期後，紅都面晒地跟我抱怨：「我以後都唔淘寶喇！」
我： 「點解呀？」（心其實已猜到她應該又中伏。）
她： 「條裙個Cutting完全唔靚，對鞋啲色好怪，仲有個袋⋯⋯啲線車得好差！」
我： 「有冇得退呀？」
她： 「但係好煩⋯⋯」
我： 「唔緊要啦！唔想煩就算！」
她： 「你唔鬧我蠢咩⋯⋯」
我： 「點會！我就係鍾意妳怕麻煩唔退貨！」
她： 「點解呀⋯⋯」
我： 「如果唔係我一早就畀妳退咗喇！」
她： 「哼，你最貨不對辦呀！」
我： 「Sorry，已經過咗三十日，冇得退㗎喇！」
她： 「咁點算呀⋯⋯」
我： 「唔⋯⋯不過就有保養，妳想點就點，聽晒妳話。」
她： 「有效期幾耐呀？」
我： 「一世保用㗎！」
她： 「睇下你表現點先啦，如果唔好用，有保養都唔要呀，一嘢掉咗你！」

她說，我是一位多功能一世保用的男朋友：當她睏了，我成了攬枕；她有好消息時，我是她那必會按下的Share Button；也是傷心、失落、氣餒與憤怒時的出氣袋；當她冷了，我的手掌是最佳的暖貼。
她： 「我以後都唔淘寶喇！」
我： 「聽住先啦！」
她： 「今次真係！」
我： 「哦。」
她： 「因為我搵到個新網，啲嘢一樣又平又靚！你覺得呢對鞋襯唔襯我呀？」

三日後實物送到……
結果是，女人一日仲有購物慾，就一定再中伏。

本篇圖文獲作者是莎比亞授權刊登，未經准許，請勿轉載！

莎比亞 Facebook: https://www.facebook.com/Shakepearelove/

作者的其他文章：

>> 朋友們，2016見好嗎

>> 2016 - 拍拖新目標