女朋友叫我陪佢睇《太陽的後裔》
文：藍橘子
有日，女朋友小豆走埋黎，語氣超作狀咁同我講。
「介紹你睇套劇，超正！叫《太陽的後裔》！」
「咩黎嫁？」
「都未睇點知喎，陪我睇啦～」
聽個名我以為係神話故事，講太陽神個仔管治人間，同雷神差不多。結果，我就陪咗女朋友睇咗幾集之後，我完全誤會咗！
我一直以為男主角係太陽神之子，原來只係一個普通軍人…不過其實佢一啲都唔普通，型棍又大隻，格鬥天王兼神射手，可以用BB彈槍黎捉賊，無論情況幾危急都可以耍帥開玩笑。
我全程都保持沉默，死魚眼咁望住個螢幕…
但女朋友就睇到鬼死咁肉緊，每個情節都畀足反應。
男主角搶返女主角手機：「哎喲好浪漫！」
被急call坐直昇機同女主暫別：「哎呀～好感人～」
返黎後去醫院門口接佢：「浪漫死人啦～」
健身Show肌：「好型啊～」
因職業而分手：「真係好慘啊…」
戴住墨鏡再遇扮若無其事：「又型又浪漫又慘啊！」
一齊返，扮拆地雷跌低摟住：「好sweet啊！」
為女主角搵支槍指住人：「想殺死人咩～」
「好期待下一集啊！」女朋友睇埋預告，仲興奮過我睇Marvel電影結尾彩蛋。
「說好的太陽呢？」我問。
「Here。」女朋友指住宋仲基。
「……」
「我平時都有接妳放工啦，唔見妳哎喲喲好浪漫咁樣！我去打Wargame又唔讚我型！」
「點同啫套劇個氣氛營造到好浪漫嘛。」
女朋友問我：「你覺得好唔好睇？」
「唔，我覺得個男主角太屈機…」
「韓劇係咁嫁啦，咁先吸引到人睇啊～簡直係男神啊！」
「妳個男神喺呢度啊喂。」我指住自己個鼻。
「Here。」女朋友搖搖頭，指住宋仲基。
為咗唔好畀女朋友繼續ff落去，我叫女朋友合埋眼。
「妳幻想住鄭中基…吖！Sorry，係宋仲基。」
「嘻嘻～好型～」
「OK，妳開返眼啦。」
「做咩？」
「閉起雙眼你最掛念誰，眼睛張開身邊竟是誰。FF少陣啦！」
我唔明！我真係唔明點解女朋友咁迷韓劇！
於是我嗰晚墊高個枕頭諗咗成晚，最終得出一個結論。
其實女仔睇韓劇就同男仔睇AV一樣…
分別只在乎男嘅會代入AV男主角，女嘅會代入韓劇女主角。
但我哋都希望得到一段超現實嘅關係。
《太陽的後裔》女主角除咗靚，個性都討人喜愛。
見到男主角喺醫院門口接放工用手臂遮臉。喺屋企洗頭洗到一半無水，逞強後被男主角督爆又率真地拎雪櫃支水去洗頭。明知同男主角因為職業關係，呢段關係唔會有好結果，就馬上分手，毫不拖泥帶水。
每個女生，都渴望自己成為好似姜暮煙咁嘅女主角，又遇到一個劉時鎮咁嘅萬能男神。
第日，女朋友突然間好認真咁同我講。
「雖然你唔係軍人，次次打親Wargame都成手彈窿，又無宋仲基咁多肌肉…但係，你都好似個劉時鎮咁，睇得出姜暮煙有咩優點，只要我講一句說話，你就完全信任我。所以你都唔洗呷醋吖～」
「我無呷醋喎，我洗呷個韓仔醋？哈！痴線啦～」
「仲有好似劉時鎮咁成日認叻～」
女朋友又話：「不過咁，有一樣你贏佢嘅。」
「咩啊？」
「就係你會陪我睇韓劇～」
喺呢個咁感動嘅時刻，我亦都捉住女朋友膊頭，好深情咁同佢講：
「雖然妳唔及女優身材咁勁爆，現實亦無可能做到AV情節，不過…」
「作死你啊！搵我黎同AV比？！」話口未完，我個鼻就畀佢用力捏住…
「咁、咁如果我戴黑超喺街度扮唔識妳咁直行直過，妳點睇呢？」
「盲佬一名。」
「……」
就算我唔及Oppa咁完美，女朋友都唔會嫌棄我。
但女朋友就好過晒天地萬物！
Girl Logic…
本篇圖文獲作者藍橘子授權刊登，未經准許，請勿轉載！
藍橘子Facebook：https://www.facebook.com/BlueGodZi/
作者其他文章：
港生活人氣本地熱話
【🎁免費送】HIZERO 輕量級F300潔地機！
【旅途無蝨】請您用AQUA PRO+TECH「驅蚊大師」滅菌驅蚊液 ！
