睇女人打交

文：磚尼特普

ViuTV其中一個重點真人秀《G-1格鬥會》終於開播，雖然個人覺得論勢頭論gimmick都唔夠《跟住矛盾去旅行》黎，但這個節目確是開了同類真人秀先河，這個節目風險很高，參賽者很易受傷，很易退賽，很多uncontrollable factors，很麻煩，而更重要係，其實我覺得，睇一班女人打交，唔係真係咁好睇。

或者自己真係唔識欣賞格鬥拳賽，看著選手比人打到面青鼻腫，也是覺得慘不忍睹，心裡很不是滋味，男性固然如此，女性更甚。就算只是第一集，看著她們做少少體能測試，有些人非常handicapped，動作姿勢又不標準又不美觀，我只是覺得她們好笨拙，女性化的形象完全破滅。如果大家試下幻想自己最喜歡的女artist，參加這個MMA格鬥秀，看著她們硬梆梆的食幾拳，比人打得面青口青，會不會胃口倒半？

可是，我還是對這個真人秀很有期待。

恕我孤陋寡聞，除了龍小菌和個HotCha成員之外，其他人真係完全唔識。無疑，有頭髮邊個想做癩痢，知名度夠高邊個會想參加尼類節目，唔通真係想挑戰自己磨練自己？我諗八個女生都是想藉ViuTV的重頭節目提升一下自己知名度，讓廣大的觀眾認識一下自己，search下自己。

或許這就是擂台底下，娛樂圈另一面的掙扎求存。

特別是我在節目之後，真係search下啲新聞，見到有人竟然會被打到可能有永久性損害，令我有多少震驚之外，對這個節目製作的認真和「去到盡」多了三分敬意，當然，最令人肅然起敬的，是八個女生都真是要付出血與汗，忍受操練和捱打的痛苦去完成這個節目，我想這些連男生都未必應付得了。

不過，若然節目的進路，並不是拳拳到肉，去到最盡，而參加者純粹抱著練拳、玩玩下的心態，玩弄女生之間的是是非非與明爭暗鬥，我想觀眾很快會放棄繼續追看下去，因為這樣沒有意思。雖然我由衷地唔想睇到女人打交，但個節目唔係拍你比人打得好金，是沒有繼續支持你落去的理由。據報道，Hotcha的黎美言在節目中成為頭號公敵，原因是太過「認真打」，但我心諗，「認真打」不是這個《G-1格鬥會》的最大價值嗎？

放長雙眼，希望這個節目不是虎頭蛇尾，令人失望。亦不會令我收回，剛剛在她們各人page上留下小小的一個like。

本篇圖文獲作者磚尼特普授權刊登，未經准許，請勿轉載！

磚尼特普 Facebook: https://www.facebook.com/throwingbrick/