超激第一身視角震撼！《爆機特攻》睇到你暈

一覺醒來，記憶盡失，眼前出現一個自稱是你老婆的人，告訴你，你叫Henry，你剛從死亡邊緣回來，當你未來得及消化這則訊息，就有人突然出現追殺你，兼拐走你老婆，身邊可信的人似乎一個都無，除了Jimmy，但事實上你都不肯定應不應該相信他，要解決所有問題，唯一辦法就係保住條命，再深入虎穴救老婆，更要找回失落的記憶。

懸疑動作兼狂灑血漿和鹽花的電影屢見不鮮，但這部美俄合拍的《爆機特攻》好玩之處是號稱全球首部以第一人稱視角拍攝的電影，即是「你就是Henry」！觀眾跟住Henry的視角去看整部電影，甚有打機過關，兼最尾要打大佬的感覺。其實近年都出現一些類似以現場視角拍成的電影，好似2009年的《D-9異型禁區》就以「偽新聞報導」的形式呈現，而2012年的《奪命異能》就乘着當時剛興起的手機拍片熱潮，讓觀眾從主角或其他人物手上的鏡頭看故事，不過《爆機特攻》就玩得更盡，大部份鏡頭以GoPro拍攝，由演員、替身或俄羅斯導演Ilya Naishuller親身上陣化身「Henry」，將攝影機戴在頭上拍攝，故「Henry」所看到的，觀眾都可以親歷其境，充滿臨場感。

Henry對白　由觀眾自己講

為了令觀眾更能代入Henry，電影透過剝奪一樣東西，卻非常巧妙地製造出一種與觀眾之間的互動，這樣東西就是Henry的「對白」，戲中重生的Henry失了聲，全程都是靠肢體語言溝通，但觀眾可以透過Henry的動作想像他腦中的對白，仿佛Henry的對白已經由觀眾的心中講出聲，觀眾自己豈不是Henry？

90多分鐘的電影由頭打到尾，刺激得令人腎上腺素飆升，不過被評為三級片非無道理，戲中Henry不斷被追殺和不斷殺人，差不多你講得出的武器都用盡，以刀仔割頸，近距離開槍爆頭，甚至生劏場面此起彼落，自問難忍血腥者真係慎入！

第一手震撼　你頂唔頂得住？ 

雖然話第一人稱視角的電影係好刺激，而且成套戲都無悶場，但係電影最難頂之處其實不在於血腥暴力，而是不停搖晃的鏡頭，因為要跟隨Henry上山下海，所以動作幅度小至輕輕點頭，大至從高處墮下，觀眾都可以用眼睛清楚感受，令人睇到頭暈眼花在所難免，小編在戲院所見，有少部份觀眾亦因為受不了而中途離場，而小編自己睇完都有少少暈眩感覺，

至於故事發展方面，去到尾段頗有驚喜，結局估你唔到，小編不在此劇透，大家自行去戲院睇，不少觀眾都可能好奇Henry的廬山真面目，小編可以告訴大家，Henry是有在電影中照過鏡，但只有一幕，大家要擘大眼睇清楚。另外，大家對戲中稍為有印象的面孔可能是飾演Jimmy的Sharlto Copley，他正是《D-9異型禁區》的男主角，他在《爆機特攻》演出多個Jimmy的分身，每個分身的性格各異，他的演出絕對是電影中亮點所在。

仍然考慮緊入唔入場的朋友，不如先看看導演在2011年為Biting Elbows拍攝的MV《The Stampede》跟下集《Bad MotherfXXker》一試水溫，當年已經係玩緊第一身視角拍攝，同樣打到飛起兼不乏血漿，電影的暈眩度、暴力度和血腥度大概是MV的十倍，大家就可能估計到自己適唔適合入場吧！

影片來源Youtube，如遭刪除請見諒。