熱愛優質生活
首頁   \   港熱話   \   拍拖耐咗,有時當女朋友好似工人咁老馮幫我

拍拖耐咗,有時當女朋友好似工人咁老馮幫我

2016.05.11

文:熱豆腐仔
  

拍拖耐咗,有時當女朋友好似工人咁老馮幫我。但其實一齊咗幾耐都好,基本禮貌還是應該要有。


仲記得初初一齊拍拖嗰陣,我會主動幫佢攞嘢、佢口乾會幫佢買水、行路都會主動去有車個邊行
到換轉佢比紙巾我抹嘴、幫我上網搵嘢,我都會笑住咁講唔該BB

但時間耐咗,好似好多嘢都唔記得晒......

 

有次同女朋友去離島行吓,點知個日落好大雨,就算有帶遮都搞到我地都好狼狽,真係濕X晒!

雖然女朋友濕晒唔驚,因為佢著緊拖鞋…但另一邊廂著住波鞋嘅我就真係喊出嚟!

個天又大雨,街上邊又多人撞黎撞去,真係搞到無乜心情
最後我地去食個tea,順便避一避雨。

 呢個時候入到冷氣房,隻腳又濕又焗!仲要又帶少少寒意,搞到自己超級唔舒服

「唉頂,濕_晒」

「要唔要紙巾?」

「唔洗啦,點抹都唔乾..不如你去對面舖是但幫我買對襪」

或者我當時語氣唔太好,連「唔該」都無聲,而女朋友都無乜表情就行咗出去

由於間舖真係好近,所以佢好快就返咗嚟。但我見到佢手上對長襪,我又忍唔住

「大佬..我著短褲波鞋,你買對長襪俾我?唔係咁潮呀嘛..」

「佢話無短嘛!又係你自己話是但嘅!」

「唉算,我自己去買對拖鞋,對襪退錢啦」

其實本身就係一件小事,但就俾我搞到大家面燶燶…雖然最後我都知錯,出盡力總算成功氹番女朋友

而呢一件小事亦令我有少少反省。

 

我發現人真係好犯賤,當一個人對你好、願意幫你,時間一耐咗就好容易當人地老馮咁要幫你、受你脾氣。但其實就算再熟嘅情人、知己,基本禮貌尊重還是應該要有!

就算好簡單俾張紙巾你,一聲「唔該」都係基本,而唔係一手攞去用完就算!

相信呢個小道理,無論男女都應該要知道~

 

P.S 就算對方姓馮,都唔好當人老馮!

 

本篇圖文獲作者熱豆腐仔授權刊登,未經准許,請勿轉載!

熱豆腐仔 Facebook: https://www.facebook.com/hothottofu/

 

作者的其他文章:
>>當我唔舒服病左,即使見唔到,我都想你陪住

>> 即使係再熟嘅知己朋友,但有啲心事你始終唔敢講出口

 

內容評分
評語