熱愛優質生活

大台離巢藝人驚喜現身!毛記台慶4大必睇位

2016.05.11

相信有唔少朋友同小編一樣撲唔到飛睇毛記電視的《萬千呃Like賀台慶》,唯有於家中睇住Viu TV強行直播。如果呢晚你因為工作,因為屋企人淨係睇無記唔畀你睇毛記,又或者你堅唔記得咗呢個大日子,都唔緊要,等小編為大家撮錄4大精彩位!

 

1.林雪走住音唱《浮誇》堅‧浮誇

節目請到其中一位嘉賓,就是大家最鍾意聽佢真情流露咁爆粗嘅「網絡男神」林雪,呢晚佢唔爆粗,而是現場演繹改編自《浮誇》,兼強行植入式廣告的Pricerite,明白了》不過無論拍片定現場都是真走音,但係越係走音觀眾就越like!

2.大台離巢藝人鮑鮑、大契、趙學而撐毛記

節目亦預備了《萬千呃Like頒獎典禮,頒發了三個獎項,結果係點當然唔太重要,都係志在開心,令人驚喜的頒獎嘉賓請到盧海鵬、夏雨和李思棋,而encore環節更有好耐無喺幕前演出的趙學而獻唱,幾人都無續約TVB一段時間,所以頒獎同獻唱之餘都不忘以演辭同改編歌暗寸大台,搏得全場掌聲。

 

3.模仿亞視永恆 掟壽包

一向喜歡明寸暗寸電視生態的毛記又點少得惡搞一下永恆不死的亞視精神,講到亞視經典又點少得「掟壽包」,不過好在毛記個場係滿座,否則又嚇親大家!

4.盤菜瑩子真‧飆高音

於模仿內地歌唱節目《中國好聲音》的環節《我是超級蒙面好聲音》中,有幾位主播輪流「參賽」,壓軸出場的盤菜瑩子以一曲《我聲帶真的受傷了》上場,估唔到嘅係原來盤菜瑩子係真唱,而唔係純惡搞,比起原曲似乎唱得高音,實在技驚四座!

 

圖:ViuTV截圖、FB@毛記電視 

 

內容評分
評語