我用咗一個鐘時間，68蚊，製造咗一個驚喜畀女朋友
文：藍橘子
今朝，我比平時早起身，
用咗15分鐘搞掂出門口（不用懷疑，男人就係咁快）
然後搭咗45分鐘車，去到女朋友屋企樓下。
再用68蚊買咗兩份早餐，上咗女朋友屋企。
未訓醒，頭髮散亂嘅女朋友一邊開門一邊大叫。
「做乜唔帶鎖匙啊…」女朋友把聲有啲嫌棄。
「痴線啊妳？我邊有你屋企鎖匙。」
女朋友雙眼一瞪，口擘擘咁望住我。
「哎呀，我以為係我老豆…你做乜會嚟嘅？」
「過黎買早餐妳食嘛。」
「嘻嘻，好啊～」
女朋友急不及待咁坐埋位等食早餐。
「刷牙啦！個口咁臭！」我。
「係喎～我唔記得刷牙添。」女朋友。
刷完牙，就一齊共享呢個價值68蚊嘅兩人份早餐。
女朋友話，
雖然我買錯咗一間又貴又唔好食嘅茶餐廳。
多士唔烘底，奶茶唔夠濃，五香肉丁得幾粒…
但係唔知點解，今次總係覺得佢特別好食。
而我最開心，梗係食完早餐可以訓返個回籠覺。
「喂妳個枕頭流口水流到濕晒嘅！」
「掛住食你個早餐囉～」
製造驚喜，唔需要買好貴嘅名牌，亦唔洗一定去食自助餐。
有時只要花少少心思，就可以畀到女朋友一個好大嘅滿足感。
好味，唔在於個早餐本身。
而係嗰份心意，同埋最重要當然係個外賣仔啦～
本篇圖文獲作者藍橘子授權刊登，未經准許，請勿轉載！
藍橘子Facebook：https://www.facebook.com/BlueGodZi/
作者其他文章：
港生活人氣本地熱話
【請您睇戲】投選您心目中的金像獎影帝影后🫅🏻👸🏻
↓立即投票贏禮物！↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
