熱愛優質生活
首頁   \   港熱話   \   女朋友成日小小事就發脾氣,但其實…

女朋友成日小小事就發脾氣,但其實…

2016.06.03

文:藍橘子

 

天下間嘅女朋友其實都一樣,成日為咗好小事而發脾氣。就好似今日咁,預定同小豆入長洲,佢提過我帶支水,費事口渴又周圍搵地方買嘢飲。
 
「得啦知啦知啦~」我好敷衍咁答佢。
 
結果,我唔記得帶!
 
「好口渴啊~拎支水出黎飲。」
當下,我虎軀一震:「我…唔記得帶。」
「我明明提咗你㗎喎!」
「我尋晚都仲記得,但今朝出門口就唔記得帶…」
「你都無認真聽我講嘢嘅!」
 
大熱天時,花咗我好耐去氹返佢。我知女朋友唔係為咗口渴無水飲而嬲,老實講,去七仔買支水有幾咁閒吖~
 
而係,佢嬲我唔記得佢講過嘅嘢…
 
諗深一層,成日怨女朋友為咗小小事而發脾氣。
但又唔諗下自己連小小事都做唔到…
 
記得有一次,我驚女朋友睇戲時冷氣太大,所以帶咗條頸巾畀佢。
結果佢就開心咗全日,出戲院都唔捨得除。
 
諗落其實好划算,
雖然女朋友因小小事而發脾氣,
但你做小小嘢,就可以氹到佢開心。
 
女朋友就係咁簡單~

 

本篇圖文獲作者藍橘子授權刊登,未經准許,請勿轉載!

藍橘子Facebook:https://www.facebook.com/BlueGodZi/

 

內容評分
評語