我發覺接女朋友放工嗰一晚，佢總會笑得特別甜
文：熱豆腐仔
「每晚放工好夜、好攰，我都好想有一個膊頭可以依靠」
記得女朋友初初踏入社會做第一份工，好多嘢都唔適應、唔習慣，一個女仔面對陌生嘅工作環境，心靈上點都會需要安慰吓
尤其是頭一星期已經好夜收工，真係好想搵人傾訴吓、發洩吓
而呢個重任，似乎就要靠我去擔當～
所以每次差唔多女朋友收工，我就會主動打俾佢傾計
「點呀？今日攰唔攰呀？」
「攰呀…真係成個人散晒..」
聽到女朋友一聲嘆氣，睇嚟都真係好攰
「不如試下爭取吓返早啲更啦，日日都咁夜真係散」
「唉條友都唔理人嘅，不過我新入職都預咗無得點出聲..」
「咁你食咗嘢未呀？唔好餓親呀～」
「食咗個包咋，我想直接返去休息算～唔講啦，我想係巴士訓陣」
「嗯..返到去call我啦」
從對話之中，我感覺到女朋友有啲唔開心
係工作壓力？係同事相處唔好？
但呢刻佢嘅唔開心，唔知點解都搞自己都失落埋一份
所以，我決定搵日佢收夜個晚接佢放工，陪一陪佢
到咗女朋友收夜嗰晚，我已經到咗附近，再打俾佢
「放工未呀？」
「放啦，岩岩換緊衫。今日咁早打嚟嘅？」
「掛住你嘛～」
「嘻，扮晒嘢你」
呢個時候我慢慢行去門口等佢，叫做俾個小驚喜佢咁啦
「我依家走啦～但點解你個邊咁嘈嘅？你唔係屋企咩？」
「唔係呀～」
我望住佢慢慢行出門口，真係成個人都好似殘晒咁～
或者岩岩出嚟做嘢真係會唔習慣
「吓？你又去咗玩呀？唔同我講嘅～」
「無去玩呀～你望吓對面馬路」
畫面就好似拍戲一樣，佢笑晒口咁望住我
或者，佢點都估唔到我會無啦啦彈出嚟～
「你..點解..係到嘅？」
女朋友又驚又喜，頓時語無倫次
「見你咁辛苦，我點都要出嚟俾啲正能量你嘅～」
我過去幫佢攞嘢，輕輕拖住佢隻手，拍一個「小拖」
雖然大家食咗少少嘢就等巴士返去，時間亦好短暫
但女朋友就keep住個開心樣到落車嗰一刻～
「其實每晚放工好夜、好攰，我都好想有一個膊頭可以依靠～今日多謝你」
「haha陪你捱過呢段適應期，我就唔再接架啦～」
「咁我永遠都適應唔到～～」
雖然出嚟一陣又返緊屋企，真係唔知自己做緊乜
但聽到女朋友咁嗲自己，都覺得總算值得嘅～
P.S 我都明白巴打們無可能每日每晚都接送，但偶爾俾個小驚喜，其實都已經可以令對方覺得好甜～ 各位可以試吓~ :)
本篇圖文獲作者熱豆腐仔授權刊登，未經准許，請勿轉載！
熱豆腐仔 Facebook: https://www.facebook.com/hothottofu/
作者的其他文章：
>> 你估淨係情侶先會呷醋？朋友之間一樣會！
>> 拍拖耐咗，有時當女朋友好似工人咁老馮幫我
港生活人氣本地熱話
【寵主專享🐾】請您試用AQUA PRO+TECH「PET PET護理套裝」！
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
