緣
文：求其花
所謂命中注定，其實即係等上天配給。
對於大部份人黎講，悠長嘅戀愛歷史裡面，同自己拍拖嘅多數係同學或者同事。由十幾歲開始，經過繁複而無乜新意嘅曖昧過程之後，終於得到屬於自己嘅初戀，開始體驗拍拖嘅滋味。
拍拖學到嘅第一件事，就係知道拍拖原來係一件要學嘅事。兩個人相處，性格需要磨合，對方唔會每件事都包容你，過完熱戀期之後，大家開始有爭執，各持己見，鬧完交又唔知點去維繫感情，鬧交，唔夾，咁咪分手囉。三日一小嘈，五日一大嘈，捱到心灰意冷，大家都試過。
過左兩三段類似嘅感情，終於發現呢個世界唔會有天造地設，而係每對情侶慢慢去適應對方，從而成為最適合對方嘅人。你好開心，忽然間，好似通靈咁知道世間嘅真理，心入面發誓下段感情一定唔會再衰，於是你重新出發，再嘗試把握另一段感情。
之後，你先至發現，原來呢個新對象，個性重係幾年前嘅自己，鬧交唔夾咪分手囉，你無底線咁去包容每件事，最後發現所謂伴侶，就好似一男一女，對腳縛埋一齊玩二人三足咁樣，話知你自己可以行得幾快，只要揀錯Partner，最後都係會仆街。
經歷各種轟轟烈烈嘅橋段，打女人呀、出軌呀、爛賭呀，容忍嗰一方終日以淚洗面。你開始明白到人類世界都會有天敵，你可以狠狠咁傷害一個人，下次就到你被人玩到體無完膚。物競天擇，適者生存，我地黎到呢個叢林，裡面有打女人嘅暴力狂、有呃錢嘅賤男、有人盡可夫嘅淫婦……爾虞我詐，綠帽橫飛嘅世界好可怕，有時你會覺得唔知點去適應呢個世界，你開始唔識睇人，你好迷惘，你期望下一個會更好，但偏偏等極都等唔到，學拍拖，又學極都學唔好。
大家都喺度等緊，大家都喺度搵緊。
我有一個經歷，當時舊女友訓喺我旁邊，問我：「如果要用一首歌，去記念我地呢段感情，你會揀咩歌？」
「尋找他鄉的故事。」我唔知首歌係咪真係叫尋找他鄉的故事，總之就係嗰首主題曲，我好記得我吹埋口哨扮片頭嗰啲笛聲。當時我喺度諗，我真係一個好幸運嘅人，上天竟然比我遇到咁完美嘅女朋友，我有種「踏破鐵鞋腳爛埋，終於比我搵到啦」嘅激動，我知唔押韻，但我開心，我唔理。
「下……你不如揀另一首……或者一句啦……」前女友好唔滿意，我估佢想我答「已經愛定你流亡情海裡沒陽光沒空氣」之類嘅轟烈野，我唔記得最後我答左啲咩，我記得嗰段時間好甜蜜，真係好似見個面就唔洗食飯咁。
但最後我地都係分左手。
然後佢開始喺Facebook度貼LMF首「愛是……」Status quote左其中一句「真愛只會出現響螢光幕度。」佢最後答左自己問嘅問題，好多年後我想以朋友身份搵返佢，佢已經唔覆我。
每個情人都只會出現喺你人生某一段時間裡面，而最終你會因為某啲事而失去對方──佢太幼稚、你太花心；佢脾氣太差、你實在太窮。或者再簡單啲丫，最適合你嘅人喺你十歲嘅時候出現，OK當你地可以順利喺埋一齊而無人反對。當你廿五歲結到婚，再當埋結婚之後就過住幸福快樂嘅日子……
我「當」左咁多樣野，淨係要你守住佢十五年，呢個社會，呢個世代，成功率有幾大？
所以我有時會覺得愛情好兒戲，愈來愈多情侶拍拖不過三年就結婚，如果結婚係一個終點，我指可以睇為身邊嘅伴侶唔會再換嘅話……
邊個幸運拎到最後張籤就贏囉，就係咁簡單。
搭配返時下結婚嘅年紀，粗略咁講，25-30歲遇到嘅伴侶好大機會同你步入教堂，而按返文首所講，大部份人嘅情人都係來自同學或者同事，咁你明唔明我意思？
同學或者同事，外貌接受到，性格同學歷唔差太遠，大家心智都準備好，而 經濟上又容許成家立室……如果再加埋道德價值，姐係只能係雙方同時單身，你先可以揀，唔容許任何橫刀奪愛嘅話……
可以選擇嘅，可能真係五個都唔到，再加埋你揀人，人揀你，最後留得低嘅，就會係你嘅丈夫或者太太。
呢種緣份，或者話呢種命運，配合「愛情」本身所裝載，偉大、崇高而充滿自由嘅包裝，「Will you marry me?」呢個彷彿充滿選擇嘅問題本身，係個黑色幽默。
特別當你明白到，一次命中注定嘅結合，本身亦都代表無數次命中注定嘅失散。
特別當我明白到，花夫人，本身只代表最岩Timing出現嘅人，而未必係我最愛、最愛我、或者最適合我嘅人。
可能人生就係因為有咁多無奈，先會創造啲詞語，去代表啲不可抗力，然後將啲責任卸晒落去，人先唔會咁難受。
所以每次分手，無論係我飛人定人飛我，我心入面都會諗……
「我地無緣份掛。」
本篇圖文獲作者求其花授權刊登，未經准許，請勿轉載！
求其花 Facebook：https://www.facebook.com/whateverfa/
作者的其他文章：
>> 像南記酸菜般的男人啊！>> 傷
港生活人氣本地熱話
【寵主專享🐾】請您試用AQUA PRO+TECH「PET PET護理套裝」！
【旅途無蝨】請您用AQUA PRO+TECH「驅蚊大師」滅菌驅蚊液 ！
