其實點解msn會被淘汰架呢？
文：B612
（唔好問我咩係msn。如果唔知，就即係根本唔係我嗰個年代，你連Google都可以慳返。）
係，即管話我MK，但我真係一個超級無敵歌詞控。以前ICQ info、msn status，任何可以擺字嘅地方都會係歌詞。而家無咗msn，都唔會放過任何Instagram、Facebook，甚至Whatsapp status擺歌詞。我真心覺得自己可以靠歌詞成為新一代治癒系作家，好似係。
嗰時嘅msn好多花臣。其實我都算手機不離手架喇，但而家咩Whatsapp呀、Snapchat咁，始終都係取代唔到以前msn嘅功能：
改名 —— 玩過ICQ／msn嘅人就會知，好多人都會改一個「網名」，即係無神神叫自己「型英帥靚正＠－＠」呀，仲要加九萬幾個符號砌下圖案咁。平時用會收埋msn個程式係螢幕一邊，但後期因為啲人個名愈改愈長，我就愈拉愈長，最後msn個friend list要全螢幕先睇得晒。
改status —— 個時一樣有「status」，雖然得一行，但大家都認真對待，就算係行開十分鐘都會寫「去咗沖涼」，聽緊咩歌又要show出嚟，驚死真係有人想知咁。不過都係擺歌詞居多。嗰個年代，人與人之間嘅溝通簡單易明好多。分咗手咩？post段歌詞話佢知你掛住佢；唔開心咩？post段歌詞等所有friend都走嚟問你咩事關心你。當你好似default每一刻都要用歌詞顯示自己嘅心情，寫埋喺個額頭到，人與人之間就無晒隔閡同誤會，成個世界清靜晒。
打機 —— msn嗰幾隻game我都超鍾意玩，尤其係旋轉泡泡球，我係會迫人應我，就算佢唔想玩都要開俾我自己一個人玩。最常鬥嘅係踩地雷，一個人玩Windows踩地雷好無意思，msn對戰就唔同喇，而且版面仲靚好多，又可以一路玩一路傾。
Stickers —— 勁多奇奇怪怪嘅gif可以用，同而家Line、WeChat差唔多，仲可以自製或者save低對方用嗰個，超好玩。
震人 —— msn有個震人嘅功能（其實只係音效），有時唔係坐喺電腦面前，聽到有人震就會行埋去睇吓係邊個。
畫畫 —— 後期出咗可以畫嘢嘅功能，當年大家嘅電腦配置頂多咪鍵盤加滑鼠，都照用滑鼠畫，通常都勁核突。
視像 —— 明明又唔係咩分隔兩地，大家都係香港仲啱啱先至放學，但硬係好鍾意玩視像。有時係開咗佢就擺埋一二邊繼續做其他嘢，當電話咁傾，一路視像一齊做功課，痴線。
馬拉松式吹水 —— 其實我最懷念嘅，係嗰個每晚放學返到屋企就同同學傾足一晚msn嘅年代。都唔知點解咁多嘢講，返學傾完，放學一齊hea吓，返到屋企都仲有得傾？成晚就係咁打字，打機，玩視像，好似同身邊所有朋友都會keep到好friend。而家人大咗返到屋企，除咗碌吓Facebook，同男女朋友text吓，根本唔會花咁多時間同人傾計。就算Whatsapp有電腦版都好，都已經唔再係玩msn咁，所有朋友全晚上線，大家都同時同緊十條友傾計咁熱鬧了。
人老了就是不斷回帶。呢啲都係回不去的從前，真係要講一句叫自己收收皮先 :'(
本篇圖文獲作者B612授權刊登，未經准許，請勿轉載！
B612 Facebook：https://www.facebook.com/b612lpp/
港生活人氣本地熱話
↓【限時搶⚡】Dermeze得美滋無皂清潔沐浴乳↓
↓修復、補濕滋潤、鎖水保水｜遠離乾燥和粗糙↓
【Chill Guide旅遊指南😎】日韓台泰越深圳2025行程攻略✈️
↓即睇最新行程懶人包、爆紅打卡點🔥、必吃美食😋等↓
