DC推土豪金中國超人！電影版邊個演最好？　

最近有網民發起向中國道歉大賽，諷刺中國人民的玻璃心，引發一輪道歉潮。不過DC漫畫毋須向中國人道歉喇，事關DC最近推出新人物「中國超人」，寫到明Made in China，中國網民見到一定好高興！

呢位中國超人叫孔克南（Kenan Kong），國旗圖案再加顆土豪金「S」字，一睇就知係個愛國嘅上進青年。未睇漫畫內容淨睇樣，就知孔克南一定紅過 Clark Kent，不過係紅色個紅！

第一集漫畫已經上架，原來孔克南開頭係個古惑仔，成日蝦蝦霸霸，後來先慢慢成為超級英雄。

 

睇到最後DC亦預告將會有中國蝙蝠俠同中國神奇女俠，膊頭一樣有五粒星。唔知中國式英雄故事究竟會點發展落去呢？

 

DC之前預告於2017推出電影版的《正義聯盟》，若中國英雄式《正義聯盟》要開拍電影，呢位中國超人搵邊位藝人演好？首要條件一定要係愛國藝人，而小編有以下幾個心水人選。

甄子丹

雖然年齡同孔克南不太符合，如果要搵老版中國超人可以由宇宙最強甄子丹出演。有一顆愛國心再加一身好武功，莫講話壞人，原裝正義聯盟英雄都未必夠佢打！

陳小春

孔克南起初都係個古惑仔，而陳小春「山雞哥」形象深植民心，未必夠上面好打，但勝在夠愛國！

Jackson@Got7

韓國男團Got7成員，不時以國旗頸枕及國旗手機殼等用向中國網民表達愛國心，獲得「愛國Boy」的稱號。翻睇角色設定，孔克南是個年輕人，相信以年齡及知名度作甄選條件，Jackson亦相當合適。

鹿晗

  
前EXO成員，內地當紅「小鮮肉」，於內地有不少忠實擁躉。加上歌影視三棲，拍戲絕對無難度！


至於中國蝙蝠俠，我諗暫時大家心水人選都非明幅俠莫屬。

來源：DC 、Huffington post、陳小春微博、FB@甄子丹 、Jackson IG、鹿晗、FB@黎明