G-Dragon品牌鐵夾賣$235！粉絲：我屋企都有好多

韓國天團BIG BANG隊長G-Dragon除了在音樂方面才華洋溢，亦是年輕人的潮流icon，他的衣着打扮是不少年輕人和粉絲的模仿對象，而他用過的同款飾物往往掀起熱潮，近日G-Dragon亦在時裝界分一杯羹，開設自家品牌peaceminusone，官網整體設計非常簡約，以黑和白為主調，唔見G-Dragon穿上自家產品的靚相，照片中只見用鐵線和鐵夾吊起產品，而產品的設計同樣簡潔，好似小編呢啲唔多識fashion的人，就實在唔多知道產品本身的設計有何賣點。

現時所見，官網上僅公開了8件產品，不過當中引人注意的不是T-shirt或cap帽，而是鐵夾！你無睇錯，真係用來夾紙的鐵夾，估唔到G-Dragon除了賣衣服，連文具都賣埋，如此一來，鐵夾會唔會成為新興潮物呢？

這個號稱100%鐵製的夾索價$30.27美元，即是約235港元，令唔少粉絲都忍唔住話貴到飛起，當然都有粉絲話「屋企有好多」啦！

講返轉頭，G-Dragon品牌強調重質不重量，每人限購一件，所以粉絲們有錢都未必買得到，但如果有心「跟」潮流的話，睇嚟今次都唔難跟喎，等小編都即刻搵搵自己個筆袋同書檯先！