[上山容易] 婆仔上樓級大法

由城門水塘上針山，大概要上2000級樓梯。上樓梯不得其法，到山頂肯定腳仔軟。 

理論上，行山需要嘅體力要求較低，一般人其實可以藉住行山得到運動嘅樂趣。不過，麻煩在香港嘅山徑梯級特多，唔少朋友行完一次山大嗌腳痛，之後就拒絕行山。見到呢啲情況，我山雞真係覺得好可惜。事關香港24個郊野公園佔香港面積4成，你唔去行山，就真係玩少好多地方。

所以話，鍾意行山可以令你睇到香港嘅另一面。而學識點行樓級，又係走入郊野嘅一大途徑。

要上樓級唔腳痛，其中一個方法當然鍛練好肌肉，而最重要嘅，就係學識上樓級嘅技巧。

我山雞都試過犯錯，而一般人上樓級會出現呢啲問題：

一、只係前半掌踏上樓級，腳踭懸空，用腳尖發力。

二、本住「長苦不如短痛」嘅宗旨，兩級一步，一氣口衝上山。 

結果就係唔單只腳痛，仲氣來氣喘，體力大為消耗，上半座山已經係咁，單係一段麥徑有幾座山，咁點行落去呢？

錯誤：半掌上樓級，要腳尖用力，或者會好快，唔會唔持久。 

到有一年，受高人指點，學識一招叫「婆仔行山」，唔係同你鬥快，而係保證唔會腳痛唔會扯氣。

1. 腳掌一定要成隻踏上梯級，盡量唔好腳尖用力將身體向上推（腳尖用力會運用小腿肌肉，會好攰）

2. 越細步越著數：腳尖盡量貼向上一級下方（我就會將鞋頭踢住上一級嘅下方），目的係唔好要隻腳抬得太高，並要以大腿用力

3. 上半身維持挺直

4. 遇到樓級太闊，可半級而上，雙腳放在同一級，再繼續上多級

5. 腳步唔需要太快，要有節奏，一步一步行就得。記住欲速則不達

6. 呼吸：切勿太急太用力，可採取4步呼吸法，即1吸2忍3忍4呼，將吸入氧氣停在體內多一點時間

7. 上到山頂，記得鬆下腳，向側邊踢幾踢，或做下拉筋 

正確：腳尖盡量貼住上一級嘅下方，逐級逐級上，大腿用力往上行，咁唔會浪費體力。 

我第一次跟呢位高手學呢招，佢陪我由北潭坳麥徑三段起點，一口氣未停過行上牛耳石山。上到山頂，我驚嘆一句：「吓！咁就行完？點解唔覺辛苦嘅？」而呢一招，對我嚟講真係一生受用。

呀，唔記得講，呢位高手叫陳國強，人哋叫佢毅行先生，我哋叫佢KK。

夏威夷嘅Haiku Stairs，英文意譯為天梯，一共有3922級樓梯。聽落好多，不過上針山都差唔多2000級，加埋草山大帽山，即係單係麥徑七八段，就肯定唔只呢個數囉。所以話，香港山徑嘅樓梯係咪好多？ 

同場加映：樓梯操練方法 

原文刊載自Fitz.hk，本篇圖文獲Fitz.hk授權刊登，未經許可，請勿轉載。