熱愛優質生活
首頁   \   大帽山郊野公園   \   大帽山棄置逾10公斤垃圾!網友鬧爆勿再踏足郊野公園

大帽山棄置逾10公斤垃圾!網友鬧爆勿再踏足郊野公園

2016.12.28

在公眾場所,尤其山野地方欠缺公德心,亂拋垃圾實在令人氣憤!有網友在Facebook發表一篇《我嚴重警告所有唔識回收同處理自己垃圾既人咪再行山露營扮親親大自然》,文章及短片中,她指在大帽山行山時發現一個爛掉了的營袋,內裡竟裝滿了垃圾,這袋垃圾超過十公斤重,就這樣被人棄置在大帽山山頭。她氣憤直斥將這些垃圾遺留在山頭的人沒有公德心,更警告不懂處理自己垃圾的人請勿再踏足郊野公園一步!最後慨嘆行山是不少都市人遠離煩囂,找一個喘息空間的地方,若所有人都是如此自私,那郊野公園就會變成另一個堆填區。

全文如下: 

《我嚴重警告所有唔識回收同處理自己垃圾既人咪再行山露營扮親親大自然》

為免標題唔夠清楚 我要再重申一次: 「我嚴重警告所有唔識回收同處理自己垃圾既人咪再行山露營扮親親大自然」

作為一個鍾意行山既人 每一次係山度見到垃圾 都無明火起 行兩步地下又有膠樽 行多兩步又有食物包裝 影張相又有張紙巾係地

為左安慰自己香港人唔係咁冇質素 亦都相信行山人士多數都係珍惜香港大自然 我就當個d紙巾食物包裝只係個行山人士係個袋度羅野既時候唔小心跌出黎 絕對絕對絕對唔係有心的

但係 今日呢單野 真係觸及左我條底線

做乜野係大帽山山頭會有一個爛左既營仲要裝滿左垃圾係裡面?

初頭同友人經過見到一堆白色野係側邊 都未有為意佢係咩 驟眼睇見到有d食物包裝 仲立心不良諗住係咪可以係人地個營度偷兩包薯片食

但係周圍都冇人 而佢放既位置又實在太古怪 再望多兩望打開黎睇…

垃圾!全部都係垃圾!

唔係 我收返 係撇除仲用得既地墊較剪匙營燈 可以回收既水樽鋁罐等等… 剩低個兩成既紙巾廚餘先係垃圾

第一反應 呆左 第二反應 爆嬲加用從未試過咁流利既粗口破口大罵鬧到對面獅子山都聽到 第三反應 係度諗究竟點樣處理呢堆野好?

同友人兩個實在唔想見到堆垃圾放係路邊 唯一既辦法就係 夾手夾腳由山頭羅返落去有垃圾桶同垃圾車到達到既地方處理左佢

但係 我真係唔係好明個物主點樣可以用到呢個營周圍都係窿 我地一路行 D垃圾就一路跌 跌完支營棍又到把較剪 唯有一路行一路執

行落山既沿途仲要不斷受盡白眼 俾人覺得d垃圾好似係我地兩個製造咁 無辜地變左做代罪羔羊

結果 我地兩個人用左廿幾分鐘 先將呢堆足足重超過十公斤既垃圾由山頭送到落個垃圾桶度

而係唔忍心見到d膠樽鋁罐都俾人掉走埋 係冇手套既情況底下只可以略略將見到既回收物放返係個回收桶度

點知 摷摷下 俾我地係堆垃圾發現左張會員證寫住「L Wan」既然係咁 我就襯呢個機會同呢位「L Wan」先生/小姐說說我既心底話:

「你好 我同友人今日係山頭發現左一堆重成超過十公斤既垃圾 被人棄置左係大帽山山頭

如果呢堆垃圾你冇份製造 只係俾人插贓嫁禍 又或者 你有份製造 但只係暫時放低 比我地遲左一步帶走做回收分類同處理 咁 請你原諒我地誤會左你

但係 如果堆垃圾你有份 而你又特登將佢留低係大帽山山頭 覺得呢件事完全無問題 亦唔會作出任何改善

咁 我懇請你以後唔好再踏入郊野公園任何一步

我相信 任何一個有良知 有公德心既人 都唔會狠心將一堆咁重既垃圾放係山邊

閣下係咪諗住山頭會好似旺角街頭隨時有無所不在既清潔工幫你執手尾清走垃圾?

試問閣下知唔知一個清潔工要將咁多人掉既垃圾羅落山 係一件幾咁辛苦既事 如果個清潔工係你阿爸阿媽老婆老公男女朋友仔女甚至乎係你自己 你會唔會都咁樣亳不留情掉係山頭?

定係你對垃圾同回收桶有認知障礙 唔知垃圾同回收物應該放係邊?容許我建議你先係屋企慢慢學下點樣用垃圾桶同回收桶 再踏足街頭同山頭 再者 我相信你係屋企都唔會隨手將垃圾掉落地塞入衣櫃掃落床底 因乜解究去到街頭或者郊野公園閣下就會變得毫無自制能力?

如果你未生小朋友 我真係恭喜你 唔會再有一個心智未成熟既小朋友俾你作出極度錯誤既身教 而若果你有仔女下一代或下下一代 我會勸喻你唔好帶佢地上山頭 當佢地以為係山度亂咁掉垃圾才是正常事 我相信「垃圾山」既出現都不遠矣

好多人上山頭 係因為厭倦左係市區見到既各種生活病態 形形式式既商場 認為係野外可以搵到令佢地喘息既空間

但係好多人將係城市既生活習慣帶到落郊區 結果 係市區經常見到既問題 已經逐步逐步係郊區浮現 再係咁 郊野公園變成另一個堆填區 都應該指日可待

最後 其實我係市區度執垃圾做回收真心做到有d攰 先希望可以係假日到郊區避下世 你地係咪咁都唔可以放過我 俾我抖下得唔得?」

文章一出引起很多網民的熱議,大部分人亦鬧爆亂拋垃圾的人太自私,保護大自然人人有責。

資料及影片來源:Celia Fung Facebook授權提供

延伸閱讀
文 : 爛玩精
2016.03.06
內容評分
評語
sirius0202
sirius0202
28/12/2016 14:20
God damn it ! WTF !