正在閱讀
【2018金像獎前夕】首次角逐影帝 鄭中基:輕鬆過做司儀!

【2018金像獎前夕】首次角逐影帝 鄭中基:輕鬆過做司儀!

2018.04.12

近年主力在電影界發展的鄭中基(Ronald),2013年憑《低俗喜劇》首度獲頒香港電影金像獎最佳男配角,而今年更憑《大樂師‧為愛配樂》首度獲提名金像獎最佳男主角,雖然電影票房成績不算標青,但能夠獲得合共四項提名,而且口碑不俗,總算有交代。早前Ronald接受港生活訪問,暢談獲提名影帝感受和拍攝心得。

Ronald表示他飾演的是非一般古惑仔,因為角色不懂得樂理,卻對音樂有一份執着,他承認今次演出是一大挑戰。電影同時入圍金像獎「最佳男主角」、「最佳男配角」、「原創電影歌曲」和「原創電影音樂」,原來Ronald希望電影攞「音樂獎」多過自己做影帝:「我哋拍攝時已經好希望可以入圍原創電影歌曲和配樂,但係完全無諗過可以提名男主角,所以係意外驚喜。」

圖:FB@鄭中基

角逐影帝有無令Ronald心情緊張?他就認為輕鬆啦!「角逐影帝比起我做主持輕鬆得多啦,我覺得做金像獎司儀係緊張好多,因為台下全部係前輩、同行、朋友,個個笑笑口望住自己,睇住自己嘅表現,反而今次自己可以坐喺台下就無咁緊張。」(註:Ronald曾於2012至2014及2017年擔任香港電影金像獎主持)

《大樂師‧為愛配樂》以音樂為題材,問到Ronald近來留意哪一類的音樂比較多?竟然是「兒歌」!他說:「我屋企呢排喺咁轟兒歌!」再問到Ronald自己有無影響到小朋友的音樂取向?他笑言:「無,我有時都唔明佢哋啲音樂品味,例如我個囡會自己上網睇卡通片,又會聽Adele,而我個仔識背晒一隻80年代嘅rock & roll歌,都唔知佢喺邊度聽返嚟,真係估佢唔到!」

圖:FB@鄭中基

圖:FB@鄭中基

今次他亦為電影獻唱主題曲《沒聽過的歌》,不少網友都相當喜歡這首作品,又希望能夠盡快聽到Ronald的新作,Ronald表示自己一直都有計劃出新碟,不過做音樂時間比較慢,而且難以兼顧拍戲,期待他出新碟的朋友可能就要再等多段時間喇!