正在閱讀
【大佬可以退貨嗎?】情節夠寫實 有兄弟姊妹才會明白的7件事

【大佬可以退貨嗎?】情節夠寫實 有兄弟姊妹才會明白的7件事

2018.07.04

泰國電影《大佬可以退貨嗎?》現正上映,電影講述廢柴大佬(Sunny 飾)與相差五年的資優細妹(Yaya 飾)自小被比較,令大佬自尊受挫,唯一的報復方法就是當細妹談戀愛時搞破壞,今次細妹搵到筍盤結婚對象(Nichkhun 飾),大佬更向未來妹夫提出收取千萬聘禮,務求令細妹嫁唔出!電影將兩兄妹故事無限放大,兩人無論性格、生活習慣和工作方式都南轅北轍,製造了不少笑話,相信有兄弟姊妹的觀眾都可能會心微笑,以下7個情節大家又覺唔覺得似曾相識?

1. 大佬嗜好感染細妹

大佬因為喜歡一套捧球漫畫而愛上打捧球,妹妹亦受大佬影響,同時喜歡該套漫畫和捧球運動,這成為了兩兄妹重要的連結。

2. 細妹當工人

細妹因為讀書而從鄉下搬到曼谷市中心居住,大佬又跟埋搬出市區,兩人同一屋簷下,不過一切家務都由細妹負責,大佬就翹埋雙手等細妹服侍。

3. 舊衣服傳給細妹

兩兄妹自小讀同一間學校,校服可以「一代傳一代」,大佬的舊校服由細妹繼承,只要將校服上哥哥的名字拆走,縫上妹妹的名字就着得,幫媽媽慳番錢。

4. 爭寵又爭食

在大佬眼中,自從細妹出生,家中的大人都只寵細妹,細妹亦因學業成績而獲得媽媽愛錫,戲中亦有兩人爭早餐的情節,爭完雞蛋爭多士,之後大佬又將成支煉奶擠入口,細妹當然萬分厭惡,直言:「成支煉奶唔使要啦!」

5. 互相投訴是家常便飯

兩兄妹生活習慣不同,例如廁板應不應該放下來都有排拗,大佬更誣衊細妹亂搞男女關係,向阿媽告狀,不過細妹當然唔會坐以待斃,又向媽媽反告大佬不是,練習投訴一流。

6. 揀男朋友要過大佬一關

妹妹同男友見家長,大佬自言代表媽媽出席,加上長兄為父,當婚事遭到大佬反對,即使明知他是無理取鬧,妹妹亦只能乖乖聽話,跟隨大佬離開。

7. 對方是人生重要時刻不可或缺的存在

雖然前面講咗唔少兩兄妹敵對的情節,不過打死不離親兄妹,兩人心底裡始終愛着對方,每個人生重要時刻總希望有對方在場,妹妹出嫁,當然希望大佬能夠到場,祝福自己。