模擬類遊戲受不少人歡迎,除了經典的《模擬市民》外,亦有一系列惡搞的騎呢模擬遊戲,例如《模擬露宿者》,當中數到經典之一必定是《模擬山羊》,玩家可以扮演一隻山羊,到處亂衝亂撞搞破壞,仲可以穿牆飛天,完全違反物理定律。而這款推出多年的騎呢模擬遊戲,最近就正式登陸Switch平台推出《模擬山羊》(Goat Simulator: The GOATY),大家有無興趣一玩?
《模擬山羊》早於2014已推出,今次遊戲登陸Switch, 不少玩家可以重溫一下遊戲中的無厘頭玩法。
遊戲玩法相當簡單,只要到處搞破壞即可!玩家可以到處橫衝直撞之外,仲可以綁上火箭噴射器周圍飛,玩法多變又可以發揮創意!做出愈高難度的破壞,仲可以獲得更高分數。
Switch版當然亦有更加入新元素,有追加多個DLC,包括喪屍模擬山羊、模擬山羊太空等。
《模擬山羊》現已於任天堂eShop推出,售價為$29.99美元(約$236港元)。
來源:Nintendo