張致恒老婆潛水兩個月終於蒲頭 寫千字文自爆借財務還錢 ：我哋去到絕路
藝人張致恒（Steven）早前被公開追債，及後他所居住的元朗村屋外遭人貼街招追數，其後他一家四口有傳已著草避人債，與外界失去聯絡。直至張致恒老婆雯雯突然上水，在社交網打千字文回應事件。
Steven老婆雯雯突然於社交網發千字文，首先點名回應借錢給Steven的口靚模Naomi。雯雯一開始感謝對方願意借出2萬元應急，亦為遲還錢致歉。不過她再澄清外間傳聞，指自己一直都未有消失避債，自爆為還錢問去財務公司借錢：「我哋去到絕路已經去咗借財務，去還一半錢畀你先，好抱歉我哋冇能力一次過還清2萬蚊畀你，我哋亦已經承受緊我哋要承受嘅，畀財務貼街招甚至追上門。但係我依家喺呢度答應你，我一定會用盡我嘅能力兩個月內還埋呢1萬蚊畀你。」
又指責對方為追債而騷擾其家人包括她的媽咪：「我嘅家人係無辜嘅，你要嬲要追我哋還錢可以嚟搵我哋一家四口，但係點解叫我哋還錢嘅時候，要用我屋企人嚟威脅我哋去還錢畀你，點解要講到搵人去騷擾我嘅媽媽拎返屬於你嘅錢。」
雯雯亦有回應被指生活富貴，住靚屋兼養狗的傳聞，她解釋所住村屋位置偏僻，租金相對較平，同時雖然有養寵物，但她寧願捱窮也不想棄養。講到買玩具給兩個兒子，雯雯回應是親戚送贈：「我係爭人錢，但係咁樣係咪代表我唔可以生活唔可以生存？我兩個小朋友咁細，係咪就唔可以有佢哋嘅童年？我爭人錢未有能力還，我承認我係有罪，但係我兩個小朋友佢哋點解有罪？」
最後雯雯亦有為老公護航：「一個男人衰鹹濕衰貪玩，係咪就要判佢死刑？既然佢依家咁努力去生存，點解唔可以畀啲時間佢慢慢做番好佢照顧兩個小朋友？大家可唔可以高抬貴手，畀我兩個小朋友可以有一個爸爸，我哋一家四口可以生存落去。」又承諾未來會還清所有錢，絕不會走數。
港生活人氣本地熱話
全新功能《U GO》強勢登場🎉！
立即探索🔍本地熱門活動📍好去處🔔食買玩情報
↓【限時搶⚡】勁送Neoflam不鏽鋼食物保鮮盒↓
↓密封防漏及分隔式設計｜耐用又環保 ↓
