$8,000全包!超亂舊房變身日系簡約風 慳錢改造3大貼士 + 淘寶傢俬!一個女仔都裝修到

2021.10.18

邊個話裝修一定要豪裝㗎?Budget有限都可以有作為,今次 90後房主 Cat 基本上所有嘢都自己嚟。短短一星期就將成間舊房由又亂又暗嘅雜物房搖身一變成日系簡約風少女閨房,改造過程只係用咗$8,000,啱晒預算唔多但又想翻新間屋嘅年輕人,一於睇吓佢有咩慳錢貼士益大家先!

第 1 招︰DIY髹油去霉

本身間房係黃色牆,令成間房望落好暗,所以 Cat 決定髹返做最基本嘅白色,未擺傢俬感覺都已經光猛咗好多。

另外,由於間屋都住咗廿幾年,天花板積落唔少霉,所以今次就順便清埋去。Cat 教路只要買枝去霉神器跟足指示就可以輕鬆抹走陳年舊霉㗎喇!


第2招︰淘寶傢俬慳一筆
改造後間房只有5件傢俬,全部都係購自淘寶,本身以為運費會好貴,但只要用集運方式就會平好多。整體色調配合返日式主題,以白色同木系為主。


1 & 2.書枱連置物架、可摺疊椅子︰洞洞板方便置物或裝飾,枱底可使用移動式置物車,摺疊式椅子夠晒慳位!


3.小茶几︰具儲物空間及內置插頭位,長方高身設計適合狹窄空間。


4.梳化床︰ Cat 近年已搬咗出去唔係成日返屋企瞓,所以選擇梳化床,既可慳位又可兩用。


5.儲物櫃︰櫃頂放置多個收納透明盒,整齊度大增。由於衣服唔多,櫃桶同時當衣櫃用。


第 3 招︰斷捨離
Cat 建議大家裝修前必須斷捨離一次,唔要嘅舊物可以轉贈或賣出。因為扔舊傢俬都可能要運費同額外收費,一嚟環保啲二嚟可以慳錢!

另外,Cat 裝修前用咗坊間一啲免費嘅室內設計 App 整定預想圖。咁就可以避免左揀右揀最後買咗一堆嘢返嚟嘅問題啦!

除咗大執間房之外,佢喺佈置上都花咗唔少心思。

例如擺咗啲蠟燭、木製相框、文青地氈等,夠晒扮嘢之餘仲為成個氛圍加咗唔少分㖭!

文青風畫布用嚟裝飾之餘仲可以遮住冷氣機位,一舉兩得!

傢俬全部都以非入牆傢俬為主,因為如果選用入牆式傢俬就要喺裝修初期特別訂製,反之就可以後期先決定。未來改造上亦較慳錢慳力。


裝修支出表:
油漆︰$300
去霉劑︰$150
淘寶傢俬︰$7,550

text│Yuen
photo│Kee、受訪者提供


立刻訂閱Telegram優惠頻道:

↓會員迎新禮遇150 U Fun換禮遇↓

↓ 立即入App到任務區領取 ↓

立即入App到任務區領取

評語

獨家優惠

輕掃查看其他優惠