2022預定發售7大新居屋 邊個係居屋王?

2021.12.20

對於希望買樓上車嘅人士,房委會旗下嘅居屋,可以話係一個最觸手可及嘅目標!有消息話房委會最快會喺聖誕節前,開會討論新一期居屋嘅銷售計劃,據說有關嘅新居屋,包括7個位於港九新界唔同區域,合共約8,000個單位,最快並會喺明年上半年發售。係時候快啲做定功課,睇定邊個屋苑啱心水喇!

1.必爭黃金地段:北角渣華道

港島區事隔十多年,終於再有新居屋落成,今次,仲要喺位置方便嘅北角!
根據房委會資料,對上一個港島區嘅居屋屋苑,已經係2005年落成嘅筲箕灣東濤苑,喺2015年5月,東濤苑一個中層單位喺第二市場以648萬嘅售價,創下居屋第二市場售價新高,成為名副其實嘅「居屋王」!

至於明年開售嘅北角渣華道居屋項目,位於電照街同馬寶道交界,為單棟式大廈,樓高31層,將會提供248個單位,預計會喺2024年初完工。呢個單位對面,就係座擁海景嘅豪宅海璇,現時嘅呎價,大約都要$45,000或以上!而海璇樓高最高為18樓,換言之,如果新居屋能抽到較高樓層,仍然有機會望到維港海景。

高層單位,仲有機會睇到維港海景!

講到交通,徒步5分鐘內,就可到達北角港鐵站及北角碼頭,英皇道就有電車同大量巴士站,可謂全港四通八達。而附近嘅北角匯、健威坊及港運城商場,有大量食肆及超市選擇,行遠少少仲有渣華道市政大廈,日常起居相當方便。北角碼頭旁邊仲有北角海濱公園連狗公園,咁嘅配套,點會唔係「居屋王」?!

行5分鐘,就可以到北角港鐵站!

居屋斜對面就係北角匯商場,除咗買嘢同食嘢,仲有戲院,起居娛樂絕對方便。

評分表:
交通 *****
生活配套 *****
景觀 ****

缺點:除咗會貴少少,都應該……無!

2.校網最靚:土瓜灣高山道

如果想搵九龍市區嘅居屋,不妨考慮高山道呢個新居屋。

今次另一個市區居屋盤,就係位於九龍土瓜灣高山道,屬單棟式大廈,提供約450個單位,預計2024年完工。

呢個屋苑最大優點,係屬於九龍城區嘅校網,屬於Band 1嘅學校就包括喇沙書院、瑪利諾修院學校及培正中學等,家長們值得考慮。

呢個居屋最大優點,係個校網極好,包括瑪利諾修院學校及培正中學等,好啱重視仔女教育嘅家長。
論交通,屋苑距離土瓜灣港鐵站約10分鐘步程,附近馬頭圍道的巴士站,有多條巴士路線途經。生活配套方面,鄰近嘅樂民新村有超市,附近嘅馬頭圍道亦有商店及食肆,若果想多選擇,就要步行約15分鐘去紅磡。

徒步去土瓜灣港鐵站,大約要10分鐘。

評分表:
交通****
生活配套****
景觀***

缺點:屬於舊區,景觀稍遜,離大型商場較遠。

3.城門河景:沙田安睦街

位於沙田安睦街嘅新居屋,可以睇到城門河河景。

另一個位於沙田石門安睦街嘅居屋,將會分兩期發展,第一期係喺賽馬會傑志中心球場同安睦街公園之間嘅單棟式居屋,由呢度徒步去石門港鐵站,大約5分鐘,旁邊亦有巴士站,有多條來往九龍同港島嘅巴士線。

旁邊嘅碩門邨,就有商場同街市。想要更加多食肆同購物選擇嘅話,可以行遠少少去石門京瑞廣場,或者城門河對岸嘅沙田第一城商場。

如果要講美中不足之處,就係因為屋苑旁邊有足球場,低層單位夜晚可能會受射燈影響,同時屋苑另一邊為工廠大廈,所以日間會多貨車出入,老人及小孩要小心交通。

徒步去石門港鐵站,大約5分鐘。

想要更多食同買嘅選擇,可以去京瑞廣場,或者城門河對岸嘅沙田第一城商場

評分表:
交通****
生活配套****
景觀****

缺點:旁邊有球場同工廠大廈,可能會有噪音!

4. 現樓發售:東涌裕雅苑

東涌裕雅苑喺明年,好有可能會以現樓發售!

喺呢批居屋之中,規模最大嘅東涌裕雅苑,預計會喺2021年底落成,共有6座大廈,提供約3,300個單位,有機會係以現樓發售﹗
屋苑鄰近私人屋苑映灣園及東環,若果要購物及搵食肆,除咗屋苑內預留嘅零售設施外,就要行走附近嘅東環商場。

優點係部分單位應該會望到海景同機場景,不過距離東涌港鐵站比較遠,徒步約需15分鐘,可能要以巴士或小巴接駁港鐵站。

離東涌港鐵站比較遠,大約要行15分鐘。

評分表:
交通***
生活配套***
景觀****

缺點:交通同附近生活配套設施有啲唔方便。

5. 鄰近單車館公園:坑口昭信路

預計約2024年落成嘅坑口昭信路居屋。

位於將軍澳坑口昭信路嘅新居屋計劃,單棟式大廈預計約有600個單位,2024年完成。由呢度行去坑口港鐵站,大約要10分鐘,屋苑旁邊嘅巴士站,亦有多條隧巴路線。

如果希望屋企附近多休憩設施嘅話,呢個屋苑值得考慮,因為由屋苑徒步約10分鐘,就可以到達坑口文曲里公園,行遠少少就係香港單車館公園。

購物同飲食方面,步行10分鐘內,可以到新寶城商場、海悅豪園商場、明德商場或港鐵站旁嘅東港城商場。

購物可以去屋苑附近嘅新寶城商場。

屋苑仲鄰近香港單車館公園。
(圖片來源:GIS)

評分表:
交通***
生活配套****
景觀***

缺點:表現平均,只可以話將軍澳遠咗少少﹗

6. 樓花期3年:啟德2B2號地盤

呢個啟德居屋要待至2024至2025年先落成。

這個地段屬於啟德2B2號地盤,提供約1,800個單位,旁邊就係港鐵宋皇臺站,相當方便。但由於預計要到2024至2025年先落成,所以抽中嘅話,樓花期都會長達約3年。

屋苑旁邊就係港鐵宋皇臺站,相當方便。

評分表:
交通****
生活配套***
景觀***

缺點:暫時附近嘅生活配套設施較少!

7. 新發展區:安達臣道RS-1號地盤

安達臣道以前係石礦場,生活配套設施同交通暫時都未發展完善!

位於觀塘安達臣道石礦場RS-1號地盤嘅居屋計劃,預計提供約1,900個單位,樓花期預計達三年多。暫時睇,由於屬新發展地區,交通比較隔涉,社區配套亦未完善,不過亦由於地勢較高,所以預計部分高層單位,有機會望到維港海景。

評分表:
交通**
生活配套**
景觀****

缺點:生活配套設施同交通暫時都未發展完善,而且樓花期比較長!

text/Joyce
photo/HKET圖片庫


有新嘢玩!《社群》專區登錄App

↓必睇人氣美食主題深度關注組↓

必睇人氣美食主題深度關注組

↓「App限時搶」大派現金券!↓

↓記得逢星期三3PM入App搶!↓

記得逢星期三3PM入App搶!

評語

相關文章

獨家優惠

輕掃查看其他優惠

【團體相教學】5大搞笑團體相拍照教學 一大班朋友外出時拍照留念 好笑又好玩!
APP獨家
【團體相教學】5大搞笑團體相拍照教學 一大班朋友外出時拍照留念 好笑又好玩!
【燒烤場推介】全港10大BBQ燒烤場推介 $150起食到!任食流水蝦+串燒放題/海景賞月
APP獨家
【燒烤場推介】全港10大BBQ燒烤場推介 $150起食到!任食流水蝦+串燒放題/海景賞月
10月全新主題酒店Staycation優惠推介!萬聖節住宿玩鬼屋/Snoopy主題房/Keigo 送禮品包+影相位
APP獨家
10月全新主題酒店Staycation優惠推介!萬聖節住宿玩鬼屋/Snoopy主題房/Keigo 送禮品包+影相位