傳35歲高海寧決定離巢轉攻內地3個月勁賺7位數 疑拒續約遭TVB冷待跌落三線心灰意冷

文: 羅志宏
2022.01.15

現年35歲的女藝人高海寧(高Ling),近年憑實力成功升上一線做女主角,在大陸更憑《三十而已》廣開知名度,內地工作量急增。身價十級跳的高Ling,近日盛傳其欲離巢外闖的消息,專心北上賺人仔,故此有傳年底約滿TVB的她,面對高層「畀足甜頭」打算送獎留人都不為所動,於是疑似遭冷待跌落三線,分分鐘心灰意冷講再見。

高海寧(高Ling)於2020年客串內地劇《三十而已》,飾演正印的她怒摑女主角江疏影一幕成功獲得觀眾垂青,迅速爆紅,憑著精湛演技,人氣愈來愈勁,微博坐擁近148萬粉絲。而高Ling就看準時機,2021年接下了多個商場活動、直播帶貨和綜藝節目,每單酬勞都是6位數字,北上掘金成功,計計埋埋密密做,短短3個月賺足7位數有多。

於TVB企穩一線花旦之位,高海寧去年只拍了一部小品製作劇集《童時愛上你》,現在只有這部存貨。有傳高Ling眼見拍大製作又冇自己份,難以再有新突破,因此萌生離巢之心,打算食住內地人氣條水,長駐內地發展,搵人仔最實際!

據傳聞透露,高海寧在傾續約期間,由起初施以「推字訣」一推再推,其後再表態拒續約,連樂易玲主理的邵氏都照請食檸檬,故令高層相當反感,索性冷待高Ling,早前在年度盛事節目巡禮更只獲編排站在第三排的不顯眼位,企位比理應同級但站在頭排的湯洛雯、張曦雯、龔嘉欣明顯差得多。

事實上,2008年參選港姐大熱倒灶而入行的高海寧,入行第14年個年頭一直拍過不少劇集,由於外表與身材較為出眾,入行初期演技稚嫩的她一度被冠上「花瓶」稱號;其後逐漸擺脫性感花瓶的形象,演技漸獲觀眾肯定。

高海寧在2020年更一連狂播4劇《殺手》、《迷網》、《反黑路人甲》及《C9特工》,被力谷上一線;2021年雖然只有一部劇《七公主》出街,但亦獲讚演技比女一黃翠如、女二林夏薇更加搶鏡,惟仍與任何獎項擦身而過,入行至今從未在《萬千星輝頒獎典禮》中獲獎。 



圖及來源:TVB、IG@高海寧

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【免費睇】《香港打卡蛋糕合集》↓

↓50間蛋糕店介紹!附真實食評/選購攻略等↓

↓50間蛋糕店介紹!附真實食評/選購攻略等↓