大西北買樓大抉擇 究竟元朗好定屯門好?

2022.02.26

對於有意喺新界大西北置業嘅朋友,一直有個「手掌又係肉,左手又係肉」嘅抉擇:究竟揀元朗好?定係屯門好呢?有網民就喺連登討論區詢問網友意見,究竟邊個區交通方便啲?起居購物同搵好嘢食,又係邊區好啲呢?結果就引起咗熱烈討論。

屯門公路塞車無得救?!
首先搬入「大西北」,如果你仍然要去市區返工嘅話,交通真係首要考慮嘅問題。有網民支持元朗同天水圍好啲:「元朗都要睇邊忽,交通嘅話天水圍同元朗都ok,錦田同大棠要揸車先掂,屯門不了,一條屯公累全家!」。但亦有人為屯門平反:「我今年由市區搬咗入屯門,其實屯公無大家想像咁恐怖,屯公岀九龍九點前有巴士專線,屯公岀事有西鐵,鐵都死仲可以行屯赤,買嘢市中心齊晒,衣食住都方便!」、「元朗大馬路+博愛迴旋處咪一樣,屯門起碼西鐵有位坐同埋環境好好多。」

有網民認為屯門嘅最大缺點,係萬一屯門公路塞車或者有交通意外,出入市區就好麻煩。

元朗、屯門,邊度多嘢玩?
咁起居生活方便度、購物食嘢選擇多唔多,都影響到揀邊區。有網友就提出元朗市中心太多人太迫,感覺唔係幾好。「元朗市中心又細又多人過旺角,行都唔想行!屯門話晒多商場,大部分地方都可以輕鐵到達,住南住北都唔怕(山景附近除外)」、「元朗多人得嚟啲路好窄,行過你就知,屯門除咗市中心一帶,其他都靜,空氣較好。」

有網民覺得元朗市中心人太多路太窄,完全唔好逛。

好多人都撐屯門市廣場購物選擇多,啲舖頭貼地得嚟又緊貼潮流,而各大屋邨都有商場,買嘢夠方便。不過有屯門更指出屯門活動點只行商場。「我係屯門人,都好少去市中心,其實碼頭、建生、置樂、龍門居、紅橋已經好多嘢食,起碼唔係度度都係領展。行山有山,海灘又有,4個戲院、 3個泳池、幾個大商場連埋。」

網民認為屯門市廣場購物飲食選擇多,而且開嘅舖貼地又緊貼潮流。

其實由屯門市中心去黃金海岸沙灘好方便,要行山亦唔使出區外,鍾意戶外活動嘅人都好多選擇。

不過亦有網民覺得元朗其實好多地方行。「成個元朗市,由YOHO、雞地、又新街、教育路、西菁街、大坑渠、劇院都有嘢行,分散到啲人流,每一條街總有幾間特色鋪,日夜都有地方玩」、「元朗嘢食高質個屯門嘅!」

為食網民就認為元朗嘅美食,高質過屯門。

買樓揀元朗、租樓揀屯門?!
其實屯門同元朗嘅範圍好大,究竟邊啲位置比較好住,網民亦有唔同心水。「屯門除咗市中心都係舊公屋老人區,環境配套仲差過天水圍。」、「個人覺得良景附近好住過市中心,又多車又少人,配套齊全。」、「元朗半新屋苑同市中心周邊嘅旺中帶靜小區,例如雞地、教育路,最好住,集交通基建、民生配套同環境好/唔太差(市中心嚟講)於一身,其他都係半斤八兩。」

有網民認為揀屯門樓,可以考慮良景附近。

有網民就提出總結,「睇目前發展,大西北次序係1.屯門近鐵/屯門碼頭(將來有鐵)、2.天水圍(南)、3.天水圍(北)、4.屯門唔近鐵、5.元朗,其實有好多好嘅新樓/半新樓,但係元朗輸畀屯門同天水圍嘅係規劃。」、「買就買元朗,租住就屯門,買梗係買升值潛力高的地方,人多車多,買市中心無死;住就揀舒服,方便自己囉。」

屯門近西鐵站嘅樓盤,都算係考慮首選。

相比屯門同元朗,配套設施較新嘅天水圍都值得考慮。

有網民提出買樓就揀元朗,因為升值潛力大啲,租樓就宜揀屯門。

text/Joyce
photo/HKET圖片庫

========

同場加映

【蝸居睇樓團】觀塘自置公屋工業風+現代感 : 紅磚特色牆、輕奢風浴廁

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【送禮】請您同毛孩免費住酒店!↓

↓立即分享寵物照片 贏走獎品!↓

↓立即分享寵物照片 贏走獎品!↓

↓正嘢!《社群》專區登錄App↓

↓必睇人氣生活+美食主題深度關注組↓

 ↓必睇人氣生活+美食主題深度關注組↓

評語

相關文章