呎價平、環境好、泊車免費 買村屋真係咁筍?

2022.03.23

好多追求居住環境好兼室內面積實用闊落的朋友,都喜歡選擇住村屋,有網民在連登討論區提出「有無人覺得買村屋著數過買大廈樓?」,更提出一連串住村屋的優點如「唔駛交管理費、無大維修、無業主立案法團、可以泊車、實用面積大」,誰知立刻被網民提出大量論點反擊!究竟住村屋利多還是弊多呢?

免費泊車位非必然
村屋多數位於郊區,未必有港鐵直達之餘,更隨時連巴士小巴的班次都少,故此有網民覺得交通已經是村屋最失分的地方:「但係地理位置已經輸咗,香港最緊要係返工,咁遠又要早啲起身,係有得免費泊車,但首先要考到牌同埋要買到車,之後仲要養車。」、「如果做freelance 或者退休生活都得嘅!」,但亦有網民認為「免費泊車喎,養車已經平好多」,誰知隨即引來大批網民反駁。

「其實絕大部份都要畀錢,係未住過果啲先以為多數唔洗錢泊車!」、「十幾廿年前可能唔使嘅!果陣新界有啲村都無乜人住,租間兩房都係三四千,而家啲車多到新嚟嘅要排等到有人唔續租先有得泊!」、「睇地方,我個friend要俾$2,000一個月村長,大時大節要捐錢俾條村,係囉,邊條村咁好泊車唔使錢介紹下!而家收$800-1,500一個月係基本,除非係圍村人,一係架車泊入自己屋企!」、「仲要村長准你行佢條私家路!」

村屋多位於郊區,要出市區返工返學的確要考慮交通問題,有私家車會比較方便。

好多人以為住村屋泊車免費,但好多網民分享話說其實不單要付費,而且未必有車位。

村屋治安差兼多蛇蟲鼠蟻?!
除了交通,亦有網民力數住村屋多個缺點:「1.多蚊蟲、2.治安差(真係有FD畀人爆格)、3.難做按揭(通常借到6-7成)、4.位置通常差,要有車出門,要泊同油錢,有小朋友要返學仲麻煩!」、「按揭得五成 / 估價唔足」、「有啲村屋一入村口就成咲牛屎味!」、「扔垃圾要行到去街口,超煩!」、「村屋好多蛇蟲鼠蟻!」、「唔覺得抵住!一嚟保安一定比大廈嘅無咁好,二嚟好多村屋都未必拉到煤氣,呢方面又會比較煩!當然,空氣會比較好亦係真!」

網民提醒村屋環境會多蛇蟲鼠蟻,亦要小心容易被爆格。

網民亦分享買村屋,做按揭時往往估價不足,可能只借到6-7成。

沙田大圍村屋夠方便
不過亦有住村屋網民力讚村屋好住:「全條村一半以上係外國人,泊車唔洗錢,泊幾多部都得,治安極好,夜晚打開門瞓覺都無人理,間唔中有鄰居出去釣多咗魚買多咗菜會拎比你,有時會車埋你出去!雜費仲正,無管理費,太陽能發電,夠自己用之餘仲有每個月仲有$1,500-$1,800拎返,畀埋地租差餉水費。」、「西貢村屋不知幾爽,夠靜,又慳泊車錢,出去九龍15分鐘唔使!一層700呎,鍾意點搞都得。」

對於地區,亦有好建議。「沙田、大圍、馬鞍山啲村屋屈機級別,大部分近鐵近市區(行10-15分鐘左右)」,「買村屋最好買有真·屋苑管理嘅,有保安、清潔最好,無煤氣都要有三相電/石油氣供應。」、「但講真我覺得村屋好似租好過買,買通常都做唔到9成,升值潛力唔高,有啲咩要維修都係要自己搞。」

有住村屋網民分享所住地區多外國人,治安及鄰里關係相當好。

若想找交通方便的村屋,網民建議可考慮沙田、大圍或馬鞍山的村屋。

若想保安或衛生環境較佳,可考慮找有屋苑式管理的村屋。

text/Joyce
photo/HKET圖片庫

========

同場加映

【蝸居睇樓團】435呎將軍澳舊居屋翻新!打造船上feel/衣帽間+儲物二合為一

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【送禮】送您5G智能電話及寵物店現金券!↓

↓ 立即分享貓狗相片 贏走豐富禮物!↓

立即分享貓狗相片 贏走豐富禮物!

↓「App限時搶」大派現金券/禮品↓

↓記得逢星期三3PM入App搶!↓

記得逢星期三3PM入App搶!

評語

相關文章