年輕情侶想搬出嚟租屋過二人世界，除咗budget，租盤地點能方便兩個人返工，都好緊要！喺連登討論區就有打算搵租盤嘅情侶，一個喺屯門返工 一個喺柴灣返工，請教網民究竟應該搵邊個地區嘅租盤，大家又有乜嘢意見呢？
其實呢對情侶係醫護人員，一個返屯門醫院， 一個返東區醫院，二人月薪約120K，每月屋租預算唔超過2萬，暫時計劃5年內都唔會生小朋友，又因為未來雙方工作地方可能有變，所以亦暫時唔想買樓。除咗希望租盤地區配套設施好之外，最緊要係方便兩個人返工，暫時嘅心水地區有上環、紅磡/黃埔同鑽石山。
但估唔到網民相當關心樓主嘅感情生活，除咗好想知兩人點認識之外，仲好明白佢哋返工地點相隔咁遠嘅感受：「可能係香港最長嘅long d！」、「你地平均一日相處時間，見唔見到2個鐘？唔計瞓覺」，而樓主亦坦白回應：「見唔到，想見多啲！」
原來樓主同女朋友係醫護人員，分別喺屯門醫院同東區醫院返工，正為揀邊區租屋而煩惱。
樓主坦白承認正因為同女友返工地點相隔太遠，見面時間少，所以想搬出嚟一齊住。
美孚同上環都諗得過！
不過睇返實際啲嘅建議，以美孚、奧運站、上環同紅磡係大熱推介。支持美孚嘅網民就話：「美孚，沒有之一！去兩邊平均嚟計一定係最快，美孚去屯門，巴士最快20分鐘，搭鐵屯馬都係半個鐘唔洗，去柴灣就搭荃灣到金鐘再轉港島線，9個字！」。支持奧運站附近嘅意見：「奧運覺得點？一個方便過海，另一個搭一個站轉西鐵」、「一定係奧運美孚中間個幾個站，點都係屯門個個著數，另一個過海轉的士」。亦有好多人支持揀上環：「中上環搵間酒店月租，一個坐780返柴灣，一個坐9XX去屯門，是唔是很好？」
好多網民建議揀美孚，認為去屯門同柴灣嘅車程時間相若。
有網民就支持揀上環，甚至可以揀間酒店月租。
黃埔係最佳選擇？
但好多網民都推介黃埔：「黃埔啦！入屯門搭鐵，去柴灣搭船過北角再轉車」、「紅磡啦，118去東區醫院有站唔洗轉車，另一半搭屯馬線兆康落都近屯門醫院」、「黃埔都不錯，區内不少food court，又有MTR，有fd港島返ifc，都係同女朋友住，坐MTR過海好方便」，原來樓主都鍾情黃埔，不過有啲擔心：「我自己初步都係紅磡/黃埔，會同女朋友商量，不過好似勁多老鼠」，但有街坊立刻出來辯護：「不會有老鼠啦！夜晚放工海旁跑步幾正！利申：黃埔居民」
當然，網民不乏好有「創意」嘅提議：「長洲，好好享受船上共處嗰40分鐘，之後再慢慢各自坐車，互相傷害！」、「如果女友係RN追shift，返工交通已經可以重新計畫，租屯醫附近，男仔返工的士轉鐵或者962、8P/788。老實講兩個唔哆（嗲）唔吊各自用1粒鐘出入，(仲要返pa追更)，不如其中一個用錢買時間！」
綜合網民意見，似乎黃埔花園係大熱，除咗去屯門醫院及東區醫院交通都方便之外，社區配套亦唔錯。
text/Joyce
photo/HKET圖片庫
=======
同場加映：
【蝸居睇樓團】鰂魚涌391呎溫馨新居 Tiffany Blue半開放式廚房、餐枱鞋櫃多功能組合櫃
」，
App內睇文同睇片可隨時捕捉U Fun彩蛋，
換領現金券及禮品！
↓ 《社群狂歡大激賞》玩盡2024！↓
↓送主題樂園丶室內遊樂場門票及人氣系列袋款等！↓
《社群狂歡大激賞》！送hellolulu最新系列袋款🎁！
