租屋新手想用5K租劏房 究竟有乜嘢要注意?

2022.04.30

好多人都認為劏房嘅存在,正正就係香港住屋問題嘅悲歌!無奈劏房問題不但無改善,而且愈來愈多人要投入劏房戶嘅大軍!有打算人生第一次搬出嚟住嘅網民,諗住租劏房,就喺連登討論區向有住過劏房嘅前輩求教心得,睇落,好似有啲無奈!

樓主表示自己二十多歲,月入15K,打算搵間月租5K嘅劏房獨居,喺租屋網上搵到有興趣嘅租盤,準備約時間去睇屋,但由於係初次租屋,所以就向網民請教:「請問有咩要特別check得仔細?有咩要先問清楚業主?如果佢問我拎中介費係咪唔駛理?點樣防黑心業主?」

樓主想搵間月租約5K嘅劏房,向網民請教喺睇樓以及同業主傾細節時,有乜嘢要注意。

租工廈仲好啲?!
但網民一聽到樓主想用5K月租劏房,都建議佢諗清楚:「搵人合租算啦,劏房個衛生環境……」、「如搵到合租最好,5k真係聽到都驚!」、「畀多少少啦!8K個環境好好多,5K真係唔知租埋垃圾盤」、「住山卡啦村屋都好過住劏房啦!」、「租工廈啦!上去做嘢,攰咪唞下囉!」樓主見到網主回應,亦禮貌地回覆:「合租就唔諗啦,搬出去都係想獨居,租金6K真係上限,自己都知出去住係咩情況,只求收足6K比返6K嘅環境我就夠。」

網民一聽到月租5K,好多人都表示環境應該好差,問樓主係咪可以畀多少少租。

亦有網民建議不如搵工廈單位住,環境可能會好啲。

食肆樓上多小強  記得要睇後樓梯
網民亦真心提出咗好多有用建議:「唔好租食肆樓上好多強!」、「留意如果連埋床/床架,睇下有無蝨屎,同埋最好唔好係低層」、「1.有啲兩劏六、得一個大門口、棚門棚死你、最好租單邊、租一劏三、遠離大門。2.入去前留意鄰居啲鞋架,有後生仔款嘅鞋要避,會有機會夜晚開大音響,帶fd上房飲酒猜枚。3.好多新裝修係得個樣,格(隔)音好差,用電子鎖果啲,禁制(撳掣)都bb聲都會好影響瞓覺。4.冇看更果啲樓,睇吓後樓梯多唔多雜物,可能有南亞、道友,瞓後樓梯過夜……運氣好仲(重)要」

網民建議唔好搵樓下係食肆,或者低層單位,因為會多蛇蟲鼠蟻。

網民亦建議要睇吓後樓梯會否多雜物,或者有道友瞓後樓梯過夜。

租屋新手10大需知
網民有心機到列出10 大租屋注意點出嚟:
「1.水電煤,有無獨立錶,無就問1度電、水、煤,幾錢?(好多睇人掠水!)
2.睇吓間房,天花板、牆有無做維修?
3.有無包電器傢俬?壞咗點解決?
4.去睇吓洗手間熱水爐、天花板,有無漏水位?牆有無爛?是否暗廁?
5.睇吓有無寬頻位?無就睇吓點拉?(有部份樓只有ADSL,仲要貴價)
6.棟樓有無雞竇……果類麻煩嘢,因為治安差,樓下有無裝鐵閘?
7.間屋有無對住垃圾位?問吓點樣倒垃圾?或者觀察間屋附近有無街市喺樓下(老鼠有機會入屋!)
8.隔離屋有無燥音?
9.問業主點交租,過戶?現金交收?
10.上期比幾多?畀幾多按金?」

一般租屋去睇單位,都要睇清楚天花、牆身及電器等有無損壞,萬一要維修,要同業主先傾好點解決。

text/Joyce
photo/HKET圖片庫
=======
同場加映:
【蝸居睇樓團】鰂魚涌391呎溫馨新居 Tiffany Blue半開放式廚房、餐枱鞋櫃多功能組合櫃

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【送禮】送您5G智能電話及寵物店現金券!↓

↓ 立即分享貓狗相片 贏走豐富禮物!↓

立即分享貓狗相片 贏走豐富禮物!

↓「App限時搶」大派現金券/禮品↓

↓記得逢星期三3PM入App搶!↓

記得逢星期三3PM入App搶!

評語

相關文章